AS Kigali ku mwanya wa 1, Rayon, APR, Kiyovu nazo zabonye amanota 3

Imikino ya Shampiyona y’icyiciro cya mbere cy’umupira w’amaguru yabaye kuri uyu wa gatandatu tariki 31 Ukwakira, isize nta kinini gihindutse ku rutonde rw’agateganyo kuko amakipe makuru yose yabonye amanota atatu.

Mu mikino yabaye kuri uyu wa gatandatu, Rayon Sports yatsindiye Rwamagana City FC iwayo igitego kimwe ku busa (0-1), cyatsinzwe na Kwizera Pierrot. Ni umukino wabereye ku kibuga cya ‘AVEGA’ cyari cyuzuye amazi avanze n’icyondo.

Umukino watangiye amakipe yombi yiga ikibuga, cyane ko cyari cyanyerejwe n’imvura yaguye muri aka Karere mu masaha ya saa munani z’amanywa (14h). Ibi byatumye amakipe yombi akina umukino wo hejuru wiganjemo amakosa menshi.

Ku munota wa 23, myugariro w’ibumoso wa Rwamagana Kubwimana Dieudonne yakoreye ikosa Imanishimwe Emmanuel wa Rayon Sports, umusifuzi ahita atanga Coup franc yatewe neza na Kwizera Pierrot, Hassan Djumaine warindiraga Rwamagana ntiyabasha guhagarika uwo mupira. Igice cya mbere cyarangiye gutyo Rwamagana ifite ubusa, kuri kimwe cya Rayon Sports.

Igice cya kabiri ikipe ya Rwamagana yaje ishaka kwishyura, ishyiragamo imbaraga, ariko kugera imbere y’izamu rya Bakame Ndayishimiye Eric bikayigora kubera ubwugarizi bwa Rayon Sports bwa Manzi Thierry na Munezero Fiston bakomeje kwitwara neza.

Umukino wavunitsemo Emmanuel Imanishimwe akaza gusimburwa na Nsengiyumva Moustapha warangiye ikipe y’i Nyanza itsinze inze 1-0, biyishyira ku mwanya wa 6 w’agateganyo n’amanota 12.

Ku Kicukiro, APR FC yakiriye ikipe y’intara y’Iburasirazuba Sunrise FC, ndetse inayizimanira igitego kimwe ku busa 1-0, cyatsinzwe na Fiston Nkizingabo. I Nyamata kandi, Bugesera FC yakiriye Musanze FC zinganya igitego 1-1.

Ikipe y’i Nyamirambo, ku Mumena, Kiyovu imeze neza muri uyu mwaka w’imikino, yakiriye Etincelles FC nayo iyizimanira ibitego 3-1, byatumye iyi Kipe y’i Rubavu iguma ku mwanya wa 15.

Ikipe y’Umujyi wa Kigali, AS Kigali yari yerekeje i Rusizi ku kibuga cya Espoir ndetse itsindira yo ibitego 0-3; ibitego bibiri byatsinzwe na Sugira Ernest na kimwe cya Janvier Cyubahiro byatumye ikipe y’Umujyi wa Kigali irara ku mwanya wa mbere w’agateganyo, mbere y’umukino uzahuza Police FC na Gicmbi FC ku cyumweru.

Nyuma y’imikino yo kuri uyu wa gatandatu, AS Kigali ubu iri ku mwanya wa mbere ku rutonde rw’agateganyo n’amanota 15, APR FC ku mwanya wa kabiri n’amanota 14, Kiyovu na Mukura zigakurikira n’amanota 13, naho Rayon Sports ubu yagize amanota 12 inganya na Police FC (izakina ku cyumweru) n’Amagaju.

Kuwa gatanu, Amagaju Fc yanganyije na Marines FC 0-0, naho Mukura VS itsindira AS Muhanga iwayo 3-1.

Amafoto yo ku mukino wa Rayon Sports na Rwamagana City FC:

UM– USEKE.RW