Ubukungu bwazamutse ku muvuduko wa 7,6% mu gihembwe cya mbere cya 2015

Ubwo hasokaga raporo igaragaza uko politiki y’ifaranga ihagaze mu Rwanda, Guverineri wa Banki Nkuru y’igihugu, John Rwangombwa, yavuze ko ubukungu bw’u Rwanda bwazamutse ku muvuduko wa 7,6% mu gihembwe cya mbere cya 2015, ngo ikizere kirahari ko buzakomeza kuzamuka ku muvuduko wari uteganyijwe.

Icyegeranyo gikubiyemo uko politiki y’ifaranga ihagaze mu Rwanda ndetse n’uko ubukungu bw’Isi bwari buhagaze mu bihembwe bibiri by’umwaka wa 2015, (Monetary Policy Status), kigaragaza ko umusaruro mbumbe w’igihugu wazamutseho 1,1% kuko ubukungu bwazamutseho 7,6% ugereranyije n’umuvuduko wa 6.5% bwariho mu guhembwe cya kane cya 2014.

Mu gihembwe cya mbere cya 2014, ubukungu bw’u Rwanda bwari bwazamutse ku muvuduko wa 7,5%.

Mu mpera za Kamena 2015, imirimo y’ubucuruzi yazamutseho 15,0% mu mibare, ugereranyije na 14,4% byari byazamutseho mu mpera za Kamena 2014.

Umusaruro wose w’inganda n’ibiva kuri serivise byazamutseho 6,0% mu gihembwe cya kabiri cya 2015 ugereranyije na 20,1% byari byazamutseho mu gihe nk’iki mu mwaka wa 2014.

Guverineri wa Banki Nkuru y’Igihugu yavuze ko uku kuzamuka k’ubukungu bw’igihugu kwatewe n’ingamba zashyizweho muri politiki y’ifaranga, ahanini zigamije kurinda ifaranga guta agaciro (inflation), aho ifaranga ryataye agaciro ku ijanisha rya 1.5% mu mezi atandatu ya mbere ya 2015, ugereranyije n’uko ryari ryataye agaciro ku kigero cya 2,6% mu gihe nk’iki muri 2014.

Nk’uko byagaragajwe, inguzanyo nshya zemewe gutangwa na banki ziyongereyeho 10,8% mu mezi atandatu abanza ya 2015, ziva kuri miliyari 325,7 z’amafaranga y’u Rwanda zigera kuri miliyari 360,8 z’amafaranga y’u Rwanda.

Inguzanyo zatangiye kubyara inyungu (Outstanding credit) mu bikorera ziyongereyeho 15,1% hagati y’Ukuboza 2014 na Kamena 2015, ugereranyije no kuzamuka kugera ku 7.9% byari byagaragaye mu gihe nk’icyo muri 2014.

Kuba ingano y’amafaranga akoreshwa mu gutumiza ibintu yaragabanutseho 4,7% akava kuri miliyoni 901,43 z’amadolari, akagera kuri miliyoni 858,83 z’amadolari, byatumye ibitumizwa hanze bigabanukaho 5,1% ugereranyije n’uko ibyoherezwa hanze byagabanutseho 6,2%.

Ifaranga ry’u Rwanda ryatakaje agaciro ugereranyije n’idolari rya Amerika, ku kigero cya 3,6% mu mpera za Kamena 2015, biza kuba bibi mu mpera za Nyakanga 2015, aho byageze kuri 4,2%.

Nk’uko Guverineri wa Banki y’Igihugu abivuga ariko, ngo ugereranyije n’ibindi bihugu bituranyi ndetse u Rwanda rutumizamo ibintu, no ku Isi, ifaranga ry’u Rwanda ryihagazeho.

Idolari ryazamutseho 5,8% ugereranyije n’ifaranga rya EURO rikoreshwa mu bihugu byo mu Burayi. Idolari kandi ryazamutseho 7,1%, ugereranyije n’Ishilingi rya Kenya, rizamuka 14,4% ugereranyije n’ishilingi ryo muri Tanzania na 15,3% ugereranyije n’Ishilingi ryo muri Uganda.

Gusa ariko, ifaranga ry’u Rwanda ryataye agaciro kugera kuri 4,5% ugereranyije n’uko iry’i Burundi rihagaze.

Guverineri wa Banki y’igihugu yavuze ko ibihuha byakwirakwijwe mu minsi ishize ko amadolari yabuze, byatumwe ifaranga ry’u Rwanda rigira ibibazo mu gihe gito ugereranyije n’idolari rya Amerika, ariko ngo Banki y’Igihugu yakoze mu kigega ikemura vuba icyo kibazo, inafatira ibihano inzu zivunja amafaranga zari zagize uruhare muri ibyo.

John Rwangombwa, Guverineri wa Banki y’Igihugu yavuze ko bazakora ibishoboka byose, bagakomeza kwita ku ifaranga ry’iguhugu no kuri rinda ibya rihungabanya mu gaciro karyo, kandi ngo hari icyizere ko ubukungu bw’u Rwanda buzazamuka ku muvuduko wari uteganyijwe wa 6,5%.

Amafoto HATANGIMANA/UM– USEKE

HATANGIMANA Ange Eric
UM– USEKE.RW