Rutsiro: Mu murenge wa Musasa abagore baracyahohoterwa bikabije

Mu biganiro Minisiteri y’Uburinganire n’Iterambere ry’Umuryango yagiranye n’abaturage bo mu Murenge wa Musasa mu karere ka Rutsiro, kuri uyu wa 23 Nzeri, abagore bakirije iyi Minisiteri ibibazo by’akarengane n’ihohoterwa  bakorerwa n’abagabo babo. Hari uwavuze ko umugabo we yamubwiye ko azamwica.

Minisitiri y’Uburinganire n’Iterambere ry’umuryango ikunze  kugirana ibiganiro n’abaturage mu bice bitandukanye kugira ngo imenye ibibazo by’ihohoterwa rikorerwa mu ngo byugarije umuryango nyarwanda, bityo bigashakirwa umuti.

Nyiranzakizwanimana Florina w’imyaka 56 afite abana 12, avuga ko izi mbyaro zose yazibyaye nta mutekano afite iwe kuko umugabo we amuhoza ku nkeke.

Uyu mubyeyi uvuga ko ahohoterwa bikabije, avuga ko umugabo we yanamusezeranyije ko azamwica.

Ati ” Nagejeje ikibazo cyanjye ku bayobozi ariko ikibabaje ni uko nta muntu unyumva,  Umugabo ahora ansenyeraho inzu, nahamagara ubuyobozi, nta muntu uza ngo abikemure Kandi no mu gihe gishize yaraye anigagura, anciraho inzugi…

yasenye urugi rwo mu cyumba cy’abana,  hari igihe nteka ibiryo ariko umugabo wanjye akaza akabimena, undi munsi umugabo wanjye yantegetse  kutazongera gukinga icyumba abana bararamo hanyuma  mu gitondo abyuka aca urugi, arukuramo  ajya kurugurisha hamwe  n’ameza yabaga mu cyumba cy’abana.”

Nyiranzakizwanimana Florina akomeza avuga ko  umwana we w’umuhungu yacikirije amashuri ye ya kaminuza  kubera umugabo we udashobotse, ahitamo kwigendera arabata kuko yabonaga se abahoza ku nkeke.

Ati ” Iyo mbwiye umugabo wanjye amakosa adukorera, iteka ambwira ko azanyica, negera ubuyobozi nkababwira ikibazo cyanjye ikibabaje ni uko banyita umusazi, gusa ntabwo nifuza kuguma muri ubu buzima kandi abandi  barateye imbere mu ngo zabo.”

Uyu mubyeyi avuga ko n’ubwo umugabo we avuga ko azamwica, ntacyo yabirenzaho, akavuga ko yemeye urwaje akaguma mu rugo kugira ngo adatererana abana babyayaranye kuko abamusigiye ntaho yaba abasize.

Umuyobozi w’umurenge wa Musasa, Ruzindana Ladislas avuga ko ihohoterwa mu ngo muri ako gace ayoboye rihari.

Avuga ko n’ubwo rigihari ariko hari intambwe yatewe ugereranyije no mu bihe byo hambere kuko bagerageje kwegera ababana mu ngo bakabaha inyigisho z’ubwuzuzanye by’umwihariko izitangirwa mu ‘kagoroba k’ababyeyi’.

Ati ” Ihohotera rikunze kugaragara n’amakimbirane yerekeranye n’imicungire y’imitungo. Kuko biragaragara ko abagabo basesagura imitungo y’urugo, abagore ntibabyishimire, bikabyara amakimbirane ndetse n’urugomo.”

Uyu muyobozi w’umurenge wa Musasa avuga ko umuntu ubwira mugenzi we ko azamwica ari imvugo ikarishye bityo ko uyu mugabo umaze iminsi abibwira uwo bashakanye agiye gutumizwa n’ubuyobozi bakamukurikirana.

Avuga ko nta bihano yahita ahabwa ahubwo ko bazamugira inama zo guhinduka yakwinangira bakaba bakwitabaza itegeko bakamuhana.

Umunyamabanga Nshingwabikorwa wa Komisiyo ishinzwe abakozi ba Leta, Angelina Muganza wari umushyitsi mukuru, yabwiye abaturage ko guteza imbere umuryango ari wo musingi w’amajyambere y’igihugu kuko kitazamuka mu gihe mu miryango harimo umwiryane.

Ati ”Hari imyifatire imwe n’imwe nko kunywa inzoga, kunywa ibiyobyabwenge, iyo ugaragaweho bene iyo myifatire  bivuze ko umuryango wawe uba wawutereranye hamwe n’igihugu…”

Avuga ko uburinganire buri mu mahame y’uburenganzira bwa muntu. Ati “ Ihohoterwa ni ribi kandi  ni icyaha kuko igihgu cyacu cyashyize umukono ku masezerano mpuzamahanga yo kurwanya ihohoterwa iryo ari ryo ryose.”

Yasabye aba baturage guteza imbere ubukungu bakava mu bujiji, bakorohereza abana babo kugana ishuri, abibutsa ko uzafatirwa mu bikorwa byo guhohotera uwo bashakanye atazihanganirwa n’inzego z’ubutabera.

Photos © Innocent Ishimwe/Umuseke

Daddy SADIKI RUBANGURA
UM– USEKE.RW