Rubanda bati iki kuri REFERENDUM yo kuwa gatanu?

*Abenshi twaganiriye ntibazi ibikubiye mu Itegeko Nshinga ryavuguruwe
*Benshi ariko barabizi neza ko Itegeko Nshinga ryavuguruwe
*Bacye ntabyo bazi, bazi ko amatora yo kuwa gatanu ari ayo gutora Kagame
*Benshi ikibashishikaje ni ugutora Referendum kugira ngo P.Kagame yongere yiyamamaze.
*Umwe yavuze ko bazamutora ariko amusaba kugabanya imisoro

Abanyamakuru b’Umuseke mu mujyi wa Kigali, mu turere twa Ngoma, Musanze, Muhanga baganiriye n’abaturage b’ibyiciro bitandukanye ku Itegeko Nshinga rivuguruye n’amatora bazakora baryemera cyangwa barihakana kuri uyu wa gatanu. Umubare munini ugaragaza ko utazi ibiri muri iryo Tegeko Nshinga icyo bazi gusa ni uko ryavuguruwe, ikibashishikaje ni uko ryemerera Perezida Kagame kongera kwiyamamaza. Gusa bamwe bo ntibazi iby’Itegeko Nshinga ahubwo amatora yo kuwa gatanu baziko bazatora Perezida.

Ishingiro ryabyo ni Perezida Kagame, ukunzwe cyane mu baturage bo hasi bagaragaza ibyiyumviro byabo kuri we. Niwe bagarukaho cyane iyo uganira nabo yaba ku Itegeko Nshinga cyangwa ku matora yo kuwa gatanu.

Jean Baptiste Ndahayo umuturage mu murenge wa Gahunga Akagali ka Nyangwe mu karere ka Burera arabizi neza ko Itegeko Nshinga ryavuguruwe ku busabe ngo nawe yatanze kugira ngo Perezida Kagame yongere kwiyamamaza.

Ati “Mu minsi ishize hano mu Gahunga twanaganirijwe na Perezidante w’Inteko atubwira uko Itegeko Nshinga ryamaze kuvugururwa. Ubu igisigaye ni uko dusubizaho Perezida wacu mu gihe cyose azaba agifite intege.”

Silas Majyambere nawe wo mu murenge wa Gahunga mu kagali ka Buramba avuga ko Itegeko Nshinga bakurikiranye uko ryavuguruwe n’ubwo icyo azi gusa ari uko ingingo ya 101 yahinduwe.

Majyambere ati “Icyifuzo cyacu cyarumviswe, nta kabuza tuzatora ririya Tegeko Nshinga rwose kuko ingingo ya 101 yahindutse.”

Alphonsine Nyirasafari wo mu murenge wa Kinoni ntagaragaza ko azi iby’itora rizaba kuwa gatanu nka Referendum nubwo bwose azi ko Itegeko Nshinga ryavuguruwe.

Ati “Tuzaba twabukereye, niyo naba ndwaye nzasindagira mpagere njye kumutora.”

Francois Murasira wo mu murenge wa Murama mu karere ka Ngoma we gutora Itegeko Nshinga rivuguruye ntabwo abitandukanya n’amatora ya Perezida. Nawe avuga ko azajya gutora Perezida. Abajijwe niba hari icyo azi ku Itegeko Nshinga yasubije ati:

“Ibyo ni iby’Abadepite ntibindeba. Njye icyo nzi ni uko tuzajya kwitorera Kagame wacu waduhaye amashanyarazi iwacu akaduha inka akaduha na mituweli tukaba twivuza kuri macye, nta kindi.”

Mu karere ka Muhanga abaganiriye n’Umuseke bagaragaza ko bazi neza ko Itegeko Nshinga ryavuguruwe ndetse ko n’itora ryo kuwa gatanu ari iryo kuyemeza cyangwa kuyihakana.

Cyakora bamwe muri bo bagarutse cyane kuri Perezida Kagame, bavuga ko bamushyigikiye kandi bifuza ko yongera kubayobora kubera icyerekezo yahaye igihugu, ndetse no kuba yaragaruye amahoro n’ituze mu baturage. Gusa ibikubiye mu Itegeko Nshinga ryavuguruwe ababizi ni mbarwa.

Alphonsine Mukeshimana umucuruzi mu mujyi wa Muhanga avuga ko Itegeko Nshinga bazaritora kugira ngo Kagame ahabwe andi mahirwe kuko ngo yahaye ijambo n’agaciro umugore.

Gusa Mukeshimana ati “Ariko turifuza ko Perezida Kagame anareba ku kibazo cy’imisoro y’umurengera ducibwa itajyanye n’ubushobozi dufite.

Abasoresha ntibita ku bushobozi bucye dufite, amaduka menshi amaze gufunga kubera ibibazo by’imisoro irenze ayo bacuruje bacibwa. Ukongeraho n’ibintu by’imisoro k’ubutaka n’ibindi…biratubangamiye cyane. Nawe mu 2017 tuzamutora ariko iki kibazo akirebeho rwose.”

Antoine Kayitare nawe wo mu mujyi wa Muhanga we ngo yishimiye ko ibyo basabye Abadepite babikoze nabo bakaba bagiye gutora Referendum bashimangira ibyo bari basabye Inteko.

Avuga ko icya mbere bishimira ari uko ibyo basabye abadepite bagiye kubibona akavuga ko kuba amatora ya kamarampaka abaye bisubije ibyifuzo bye.

Hawa Nyirasafari wo mu murenge wa Nyamabuye we avuga ko ibyo gutora Referendum atabyitayeho kuko atazi ibikubiyemo, gusa avuga ko azajya kuyitora kuko aziko izaha amahirwe Perezida Kagame yo kongera kumuyobora kuko ngo kubwa Perezida Kagame aribwo akora imirimo ye atuje kandi akaryama agasinzira.

Elia Byukusenge & Elise Muhizi &Placide Hagenimana
UM– USEKE.RW