Perezida Kagame yagaragaye abaza De Gaulle iby’Amavubi yari atsinzwe 4

Ikipe y’u Rwanda yari imaze kunyagirwa ibitego bine imbere ya Perezida Kagame wari waje kuyashyigikira bwa kabiri mu mikino itatu amaze gukina muri CHAN2016. Ku ifoto Perezida yagaragaye asa n’ubaza umuyobozi w’umupira w’amaguru ibiri kuba kuko Amavubi yari amaze gutsindwa ibitego bine.

Nubwo bigoye kumenya ibyo yamubazaga, ariko Perezida yagaragaye asa n’umubaza ku biri kuba mu kibuga n’impamvu yabyo.

Hari nko ku munota wa 42 mbere gato y’uko igice cya mbere kirangira, Amavubi yari amaze gutindwa na Les Lions d’Atlas ya Maroc ibitego bine yo afite kimwe gusa.

Gusa Amavubi yabashije gukomeza mu itsinda A ari imbere n’amanota 6, ikurikiwe na Cote d’Ivoire banganya nayo amanota, ariko Amavubi akaza imbere kuko yatsinze umukino wayo na Cote d’Ivoire ari nacyo gikurikizwa mbere muri iri rushanwa.

Amavubi ategereje kumenya iyo bazakina muri 1/4 bitewe n’uko imikino yo mu itsinda B hagati ya Cameroun Vs DRCongo na Ethiopia Vs Angola iri burangire.

Abafana bari baje ari benshi, nubwo bwose imvura itari yoroshye kuri stade, benshi bari biteze ko Amavubi aza kurangiza imikino yo mu matsinda yemye, ariko siko byarangiye, birashoboka ko Perezida Kagame yabaza Vincent de Gaulle Nzamwita impamvu y’uku gutsindwa.

Umwe mu bayobozi bigeze kwicarana na Perezida Kagame ku mukino wa Volleyball mu biha byashize, yabwiye Umuseke ko Perezida aba yifuza kumenya impamvu y’ibitagenda cyangwa ibidasanzwe ari kubona. Bityo akabibariza aho aba bayobozi b’imikino baba bicaranye.

Ku mugoroba nabwo agomba kuba yabazaga impamvu Amavubi yariho atsindwa ibitego byinshi mu gihe gito, igisubizo cya De Gaulle cyo biragoye kugikeka….

Photos/Umuseke

UM– USEKE.RW