Ngoma: Umugore ‘wishe’ umugabo we amukase ijosi yafashwe na Polisi

Umugore w’imyaka 22 y’amavuko wo mu murenge wa Jarama mu karere ka Ngoma uherutse kwica umugabo we Habumugisha Jean Pierre w’imyaka 38, ndetse akaba yemera icyaha, yatawe muri yombi na Police y’u Rwanda ku wa kane tariki 6 Kanama 2015 nyuma yo kumara igihe yaraburiwe irengero.

Ibi byemejwe n’umuvugizi wa Polisi mu ntara y’uburasirazuba akaba n’umugenzacyaha wa Polisi muri iyi ntara IP Emmanuel Kayigi.

Mu kiganiro twagiranye ku murongo wa telephone IP Emmanuel Kayigi  yavuze ko uyu mugore witwa Iradukunda Leonille yafatiwe mu murenge wa Rukira n’ubundi muri aka karere ka Ngoma gusa ni umurenge utandukanye cyane n’aho yakoreye icyaha muri Jarama.

Yafashwe ku bufatanye bw’abaturage na Polisi nyuma y’ubutumwa bwakomeje gukwirakwizwa na Polisi itangaza ko uyu mugore ashakishwa.

Polisi iravuga ko byagoye uyu mugore kuba yabona aho atorokera.

Iradukunda yemera icyaha cy’uko yishe umugabo we amukase ijosi gusa akavuga ko yitabaraga ngo kuko umugabo we ari we wari uzanye icyuma agiye kumwica hanyuma umugore ngo akamurusha imbaraga akakimwambura akaba ariwe ukimwicisha.

Gusa ibi Polisi ibihakana ivuga ko bidashoboka atari na byo kuko ngo ibizamini byo kwamuganga byerekanye ko umugabo yakaswe ijosi icyuma giturutse ku nyama y’imbere bakunda kwita “ingoto” ngo ibi bihita byerekana ko yamwubikiriye aryamye.

Umuvugizi wa Polisi mu ntara y’Uburasirazuba IP Emmanuel Kayigi arasaba abaturage kudahishira ingo zifitanye amakimbirane.

Agira ati ”Ndasaba rero abaturanyi kujya batanga amakuru mu nzego zitandukanye zaba iz’umutekano cyangwa iza Leta aho kugira ngo babitangaze ari uko hari uwishe undi.”

Uyu mugore atwite inda y’amezi abiri akaba yaramaranye amezi umunani na Nyakwigendera. Icyaha ni kimuhama ashobora kuzakatirwa igifungo cya burundu nk’uko biteganywa n’ingingo ya 140 mu gitabo cy’amategeko ahana y’u Rwanda.

Elia BYUK– USENGE
UM– USEKE.RW