Igikombe cy’Amahoro: Rayon Sports, APR, Espoir na AS Kigali zageze muri ½

Imikino ya ¼ yo guhatanira igikombe cy’Amahoro yabaye kuri uyu wa gatandatu yasize Rayon Sports FC, APR FC, Espoir FC na AS Kigali zigeze muri ½.

APR FC  yasezereye Kiyovu Sports iyitsinze 1-0, igitego cya Sibomana Patrick cyabonetse ku munota wa 89, impande zombi zatangiye kwitegura ko zigiye muri Penalite.

AS Kigali yo yasezereye Amagaju iyatsinze ibitego 2-0, hanyuma Espoir FC y’i Rusizi isezerera AS Muhanga iyitsinze 3-0.

Umukino wabaye nyuma y’indi yose, ni uwahuje Rayon Sports na Gicumbi FC warangiye Rayon Sports itsinze ibitego 4-1. Ibitego bya Rayon Sports byatsinzwe na Ismaila Diarra na Manzi Thierry byabonetse mu gice cya mbere, n’ibya Kasirye Davis na Manishimwe Djabel byabonetse mu gice cya kabiri.

Mu cyumweru gitaha, kuwa kabiri tariki 28 Kamena, nibwo hazaba imikino ibanza ya ½, Espoir FC i Rusizi izakira APR FC (Rusizi, 15h30); Naho  AS Kigali yakire Rayon Sports (Stade ya Kigali i Nyamirambo, 15h30).

Roben Ngabo
UM– USEKE.RW