Gatsibo: Rucagu yasabye Urubyiruko kurushaho kunga ubumwe

Mu muhango wo gusoza itorero ry’urubyiruko rwo mu Ntara y’Amajyepfo rugera ku 1114, Umuyobozi w’Itorero ku rwego rw’Igihugu Rucagu Boniface yabasabye kurushaho kunga ubumwe.

Uyu muhango wabaye ku wa gatandatu tariki ya 28 Werurwe 2015, mu kigo cya Gisirikare i Gabiro mu karere ka Gatsibo.

Urubyiruko ruhagarariye urundi mu tugari no mu mirenge igize Uturere tw’Intara y’Amajyepfo rwatojwe indangagaciro na kirazira z’umuco nyarwanda.

Perezida wa Komisiyo y’Itorero ry’Igihugu, Rucagu Boniface yabwiye intore ko zikwiye guhindura imikorere bubaka Umunyarwanda nyawe.

Rucagu yagize ati “Mwirinde ibishobora kubatanya, mwubahane mwese, mube abarinzi b’ibyagezweho, mugende mugamije guhindura Abanyarwanda b’Intara y’Amajyepfo mu myumvire, imikorere, n’imitekerereze.”

Umunyamabanga uhoraho muri Minisiteri y’Urubyiruko n’Ikoranabuhanga Rosemary MBABAZI yashimiye abafatanyabikorwa bafasha Minisiteri y’Urubyiruko n’Ikoranabuhanga (MYICT) mu gutoza, barimo Itorero ry’Igihugu (NIC), Minisiteri y’Ubutegetsi bw’Igihugu n’Uturere twose, Inama y’Igihugu y’Urubyiruko (NYC) , Minisiteri y’Ingabo, Polisi y’Igihugu.

MBABAZI avuga ko uru rubyiruko rwatojwe binyuze mu buryo butanu bw’Imitoreze y’Intore burimo imyitozo ngororamubiri ifasha urubyiruko mu kugira ubuzima bwiza, imikoro-ngiro ibafasha kwishakamo ibisubizo no kureba kure, ibiganiro, kwiyereka bigamije kubafasha gukorera hamwe badasobanya, gutarama no guhiga.

Uru rubyiruko rwashyikirijwe icyemezo cy’Umutoza w’Intore bahiga no kuzesa imihigo bishyiriyeho mu gufasha urubyiruko rwo mu tugari bahagarariye kwiteza imbere.

Umuhuzabikorwa w’Inama y’Igihugu y’Urubyiruko ku rwego rw’Igihugu, Shyerezo Norbert avuga ko izi ntore zigiye gukora ibikorwa bitandukanye bizafasha mu guhindura aho baturuka mu tugari binyuze mu ndangagaciro bigiye mu itorero.

Yagize ati “Muharanire ubuzima bwiza, mukorera mu matsinda yo kuzigama, murwanye ibiyobyabwenge n’abashaka gushora ubuzima bw’urubyiruko mu kaga, muharanire gushaka ibisubizo mufasha abatishoboye.”

Teta Phionah umwe mu batojwe, avuga itorero ryatumye amenya indangagaciro yakwifashisha nk’urubyiruko mu gufasha bagenzi be mu kagari aho aturuka.

Teta ati “Twigiye indangagaciro zitandukanye mu itorero, ibi bizadufasha kwereka urubyiruko tuyobora uburyo bwo kuzimakaza dushaka ibisubizo ku bibazo dufite mu tugari twacu.”

Iri torero ryabaye mu matariki ya 22-29 Werurwe 2015, ryitabiriwe n’uturere umunani tw’Intara y’Amajyepfo. Insanganyamatsiko yaryo yari “Twahisemo kuba Umusingi w’Iterambere.”

Amafoto/Twizeyimana Eugene

NYC

UM– USEKE.RW