Abadepite batanze ibitekerezo byabo kuri SDGs zizasimbura MDGs

*Gukora ubuvugizi mu kuzamura uburinganire n’ubwuzuzanye bw’abagore

* Guhanga akazi ku rubyiruko no gukemura ikibazo cya mayibobo (abana bo ku muhanda)

*Gusaba ibihugu bikize gutanga amafaranga angana na 0,7% y’ubukungu bwabyo nk’uko byabyiyemeje

Ibyo ni bimwe mu bitekerezo abadepite bagejeje kuri Minisitiri w’Imari n’Igenamigambi, Amb Claver Gatete ubwo yabagezagaho ibiganiro bigamije kubasobanurira aho u Rwanda ruhagaze mu kwesa imihigo ya MDGs ndetse na gahunda izazisimbura yitwa SDGs (Sustainable Development Goals) http://www.umuseke.rw/mdgs-zirarangiye-ubu-haje-ibyitwa-sdgsbyo-bituzaniye-iki.html)

Intego z’Ikinyagihumbi, MDGs (Millennium Development Goals) ni gahunda Umuryango w’Abibumbye wari wemeje muri Nzeri 2000, iyi gahunda yari ikubiyemo intego zo kurwanya ubukene, kandi nk’uko byagarutsweho na Minisitiri Gatete ndetse n’uhagarariye UNDP mu Rwanda Lamin Manneh, ngo u Rwanda rwazigezeho uretse mu bijyanye n’imirire.

Hon Mukabalisa Donathile Perezida w’Inteko Nshingamategeko umutwe w’abadepite, mu ijambo ritangiza ibyo biganiro yavuze ko umubare munini w’Abanyarwanda bavuye mu bukene bitewe na gahunda zishingiye ku miyoborere myiza ya leta iriho mu Rwanda.

Gusa ariko yibukije ko ubukene bukiri imbogamizi ikomeye ku buryo igihugu kitaragera aho kifuza, aha akaba yavuze ko Abanyarwanda bane ku icumi (4/10) bakibayeho mu bukene, mu gihe Umunyarwanda umwe kuri batanu (1/5) ariho mu bukene bukabije.

Izindi mbogamizi, Mukabalisa asanga zugarije u Rwanda, ni uko bamwe mu Banyarwanda bagifite ingengabitekerezo ya Jenoside, kandi bakabishyigikirwamo na bamwe mu banyamahanga, ndetse ngo u Rwanda ruracyatakaza ubutaka bwinshi bwera binyuze mu kwangirika kw’ibidukikije.

Umuyobozi wa UNDP-Rwanda, Mr Lamin Manney yavuze ko ashima uburyo u Rwanda rwashyize mu bikorwa intego hafi ya zose z’ikinyagihumbi, gusa avuga ko hari imbogamizi y’ikibazo cy’imirire mibi mu bana aho hakiri umubare munini w’abana bagwingiye.

Ubwo Minsitiri w’Imari n’Igenamigambi, Amb. Gatete Claver yasobanuriraga abadepite ibya SDGs yavuze ko ari gahunda izemezwa muri Nzeri 2015, ikaba ifite intego 17, ibyo igomba kugeraho (targets) 69 ndetse n’ibizagenderwaho bareba (indicators) 300.

Gatete yasobanuye ko muri MDGs ibyinshi byagezweho ndetse bitewe n’icyerekezo igihugu cyihaye (Vision 2020), ngo hari aho u Rwanda rwagiye rurenza intego za MDGs. Ingero zirimo ibijyanye n’ubuzima aho abana bapfa batarageza ku myaka itanu ndetse n’abagore bapfaga babyara imibare yagabanutse cyane.

Minisitiri w’Imari yavuze ko mu cyumweru gitaha, i Addis Abeba hazabera inama izahuza Africa n’ ‘Abaterankunga’ bakanoza neza ibikubiye muri SDGs ndetse bakanaganira na bo kuri zimwe mu nzitizi zagaragaye mu buryo bwo gutanga amafaranga yo gushyira mu bikorwa bene izi gahunda aho, usanga ibihugu bikize bishyiraho amananiza ndetse bimwe ntibitange inkunga uko byabyiyemeje.

Abadepite batanze ibitekerezo byabo kuri iyi gahunda ya SDGs izemezwa muri Nzeri i New York, aho bamwe basabye ko hajyaho gahunda inoze yo guteza imbere uburinganire mu ngengo y’imari y’ibihugu.

Hon Mudidi Emmanuel yabwiye Minisitiri w’Imari ko amafaranga ibihugu bikize bitanga adatangwa ku bw’impuhwe, bityo ngo bagomba kumva ko ari inshingano biyemeje mu guteza imbere Africa n’ahandi bitewe n’uko na bo iterambere ryabo ari umutungo w’aho hantu batwaye.

Hon Mukayuhi we yavuze ko bazaganira cyane ku buryo urubyiruko rucika Africa rukajya i Burayi, na ho ugasanga babafata nabi bidakwiye umuntu. Iki kibazo cy’urubyiruko kikaba cyanagarutsweho na Hon Ruku-Rwabyom wavuze ko mu gihe tugifite urubyiruko rwinshi rudafite akazi ndetse n’abana bo ku muhanda bizagorana kugera ku iterambere.

Gahunda y’Intego z’ikinyagihumbi mu bihugu yahuye n’imbogamizi z’uko ibihugu bikize bitatanze 0,7% by’umutungo nk’uko byabyiyemeje bituma itagerwaho hose. Ubu haribazwa uko SDGs ije kuyisimbura yazagerwaho 100% binyuze muri ubwo bufatanye bw’ibihugu bikize n’ibikiri mu nzira y’amajyambere.

Amafoto/HATANGIMANA/UM– USEKE

HATANGIMANA Ange Eric
UM– USEKE.RW