Urukingo rwa Ebola rwemejwe 100%

Kuri uyu wa Gatanu, Ishami ry’Umuryango w’Abibumbye ryita ku buzima, OMS ryemeje urukingo rwa Ebola ko rushobora kwizerwa 100%. OMS ivuga ko bishobotse uru rukingo rwatangira kuboneka ahantu hose mu mwaka wa 2018.

Mu igerageza ryakozwe mu bitaro bikomeye, ryarangiye abantu ibihumbi bitandatu bo muri Guinea bahawe uru rukingo mu mwaka ushize nta n’umwe wanduye iyi ndwara.

Ubu bushakashatsi kandi bugaragaza ko abantu 23 bo mu rindi tsinda ry’abatarahawe uru rukingo banduye iki cyorezo.

Umuyobozi w’ungirije wa OMS wanayoboye ubu bushakashatsi, Marie-Paule Kieny  yagize ati “ Tugereranyije kuba nta muntu wanduye mu bahawe uru rukingo na 23 banduye mu batararuhawe, bigaragaza ko uru rukingo rwizewe kugera kuri 100%

Icyorezo cya Ebola cyagaragaye bwa mbere mu 1976 mu gihugu cya Repubulika Iharanira Demokarasi ya Congo, kuva icyo gihe kibasira abatari bacye ku Isi.

Mu mwaka wa 2014 Ebola yibasiye igihugu cya Guinea by’umwihariko mu majyepfo y’iki gihugu cyanakorewemo ubu bushakashatsi buvuyemo urukiko rwacyo.

Mu myaka ibiri ishize, abantu basaga ibihumbi 28 banduye iki cyorezo kibasiye ibihugu nka Guinea, Liberia na Sierra Leone. Muri iyi myaka ibiri iki cyorezo cyahitanye abasaga 11 300.

UM– USEKE.RW