U Rwanda rwamuritse igikombe cya zahabu rwabonye mu Butabera

Kuri uyu wa gatanu tariki 4 Werurwe, Perezida w’Urukiko rw’Ikirenga na Minisitiri w’Umurimo n’uw’Ubutabera n’abandi bayobozi bakuru mu butabera, bamuritse igikombe u Rwanda rwegukanye mu bijyanye no kwakira no kubika ibirego binyuze mu Ikoranabuhanga (Rwanda Integrated Electronic Case Management System, IE CMS), iki gikombe cyatanzwe n’umuryango AAPAM.

Iki gihembo cyatanzwe mu nama iheruka kubera i Lusaka y’uyu muryango, AAPAM (African Association for Public Administration and Management) yabaye muri Gashyantare 2016.

Perezida w’Urukiko rw’Ikirenga, Prof Sam Rugege yavuze ko iki gikombe ari ishema ry’Urwego rw’Ubutabera n’igihugu, n’Abanyarwanda.

Ati “Tugomba kwishima kuko twatsinze ibihugu by’ibihanganjye, ni ibimaze kumenyerwa, dukomereze aho. Iki gikombe ni ikindi kimenyetso ko turi ku isonga mu gukoresha ikoranabuhanga no gutanga serivise nziza ku Banyarwanda.”

Sam Rugege yavuze ko ikoranabuhanga rya IE CMS riszoroshya akazi mu bucamanza bitewe n’uko umwanya wo kwakira no gutanga ibirego uzagabanuka kuko umuntu ashobora kubitangira aho ari biciye muri Internet, icyo gihe ngo kikazakoreshwa ibindi.

Yavuze ko iryo koranabuhanga rizongera ‘transparency’ (umucyo) mu butabera, kuko mbere wasangaga ngo ibyo mu nkiko birimo ubwiru, ariko ngo ubu umucamanza azajya aba afite akazi ko gufata umwanya agaca urubanza, ariko yabanje kubona ibivugwa n’impande zombi ziburana.

Ati “Bigiye koroshya akazi mu butabera kandi butangwe vuba, umuntu ajye akurikirana impamvu imanza zasubitswe cyangwa zatinze.”

Yasabye ko kuburana hifashishijwe ikoranabuhanga ry’amashusho ya kure (Video conference) bigomba gushyirwamo imbaraga bigakoreshwa kugira ngo bigabanye ikiguzi cyo gutwara imfungwa binagabanye ingendo z’abacamanza n’Abavoka.

Minisitiri w’Abakozi ba Leta n’Umurimo, Uwizeye Judith yavuze ko iki gikombe gikomeye cyane kuko ngo ni cyo gikuru gitangwa n’uyu muryango wa AAPAM.

Yavuze ko ubu u Rwanda rugiye imbere y’ibihugu bisanzwe ari intangarugero mu bijyanye n’imikorere y’Ubutabera, nka Africa y’Epfo, Misiri, Ghana na Kenya.

Ati “Nta we usaruro icyo atabibye, iki gikombe n’ibindi tuzabona ni umusaruro w’imbuto y’imiyoborere myiza.”

Minisitiri w’Ubutabera Johnston Businge yavuze ko uretse iki gikombe n’ibindi byose bizaza u Rwanda rugomba kubitwara, akaba yasabye abashinzwe ikoranabuhanga kurigeza mu nkiko zose z’igihugu.

Yavuze ko kuva mu 2004 urwego rw’Ubutabera rutangira kwiyubaka, hagiye hashyirwamo ikoranabuhanga buhoro buhoro, none ngo bigeze aho bagaba amashami bitanga umusaruro wo gutwara igikombe.

Inzobere mu ikoranabuhanga, Niceson KARUNGI wagize uruhare muri iri koranabuhanga ryiswe Rwanda Integrated Electronic Case Management System, (IE CMS) yavuze ko umuturage azajya abasha kurikoresha akurikirana ikirego cye. Iyo ufunguye www.iecms.gov.rw, bagusaba kugiramo izina n’ijambo ry’ibanga, noneho ukaba wabasha kumenya ibivugwa mu kirego urimo.

Yavuze ko iri koranabuhanga rizajya rifasha umuntu gutanga amagarama y’urubanza akoreshe telefoni, ariko yabanje kwakira ubutumwa bugufi. Ikindi rizamarira abarikoresha n’ubutabera ni uko buri kirego kiba gifite nomero kugikurikirana bikoroha, kandi na ‘signation’ (urupapuro rutangwa mu rukiko) ngo ruzajya rutangwa binyuze kuri Internet.

Umuryango AAPAM watanze iki gihembo, watangiye mu 1971, ariko utangira gutanga ibihembo nyuma y’imyaka irindwi, ifite icyicaro i Nairobi muri Kenya.Ugizwe n’inzego nkuru za Leta muri Africa no ku Isi hose ariko si ibihugu, ukagira inama yitwa ‘Round Table’ ihuza abanyamuryango ibera mu gihugu cyatoranyijwe, ikayoborwa n’Umukuru w’igihugu yabereyemo, ndetse mu banyamurayango n’inzego z’abikorera ziremewe.

Uretse iki cyatanzwe ku Rwanda muri uyu mwaka wa 2016, kuri iyi gahunda y’ikoranabuhanga ya IE CMS, Urwego rw’Abinjira n’Abasohoka rwabonye iki gihembo mu 2009 rugiherewe kuba abantu baka Visa binyuze mu ikoranabuhanga.

Zimwe mu mpamvu zigenderwaho batanga iki gihembo, hari ukuba umushinga (icyakozwe gisabirwa igihembo), gifitanye isano no gukoresha ikoranabuhanga mu gutanga serivisi ku baturage, kuba ari umwimerere, kuba kitazabura amafaranga ngo gihagarare, no kuba gifitiye akamaro abantu benshi. Mu mishinga 51 yaturutse mu bihugu 13, igera kuri 20% yari iy’Abanyarwanda.

Amafoto/HATANGIMANA/UM– USEKE

HATANGIMANA Ange Eric
UM– USEKE.RW