Tito Rutaremara yabwiye urubyiruko impamvu hari abavuga ‘Double Jenoside’

Rulindo – Mu kiganiro yatanze ku mugoroba wo kuwa gatatu ku ishuri rya Tumba college of Technology Senateri Tito Rutaremara yasubije ibibazo bitandukanye abanyeshuri benshi bari muri iki kiganiro bamubajije ku bigendanye na Jenoside ku kiganiro cyagarukaga ku munsi mpuzamahanga wo gukumira no guhana icyaha cya Jenoside. Anababwira impamvu mu Rwanda hari abakivuga ko habayeho ‘Double Jenoside’.

Urubyiruko rwiga amasomo y’ubumenyi ngiro mu ikoranabuhanga n’isakazabumenyi mu ishuri rya Tumba College of Technology rwari rwitabiriye cyane iki kiganiro na Senateri Tito Rutaremera, umwe mu nararibonye kandi mu bavuga rikijyana muri Politiki y’u Rwanda mu myaka 21 ishize. Rwinshi muri uru rubyiruko ni abavutse nyuma ya Jenoside yakorewe Abatutsi, amatsiko ni menshi ku byo bayumvaho.

Yabanje kubasobanurira ko Jenoside ari umugambi w’ubwicanyi, utegurwa, ugashyirwa mu bikorwa na nyuma yawo hakabaho uburyo bwo kuwuhakana.

Avuga ko Jenoside ari icyaha cyo kwambura ubuzima ubigambiriye itsinda ry’abantu bahuriye ku bwoko, ku bitekerezo bimwe,ku myemerere, kubashyira mu buzima bubi, gushyiraho uburyo bubuza iryo tsinda kubyara, kwambura iryo tsinda abana babo bagahabwa irindi tsinda n’ibindi bifite aho bihuriye n’ibi.

Umwe muri uru rubyiruko rw’abanyeshuri yabajije Hon Tito Rutaremara impamvu yumva hari abavuga ko mu Rwanda habayeho ‘Double Jenoside’, Hon Rutaremara aramusubiza.

Hon Rutaremara ati “Jenoside ni umugambi utegurwa, hakicwa abantu bakuru hakicwa abana hakicwa n’abana bataravuka bakabavana mu nda y aba nyina nk’uko byagenze mu Rwanda. Ibyo bitandukanye n’ibyaha by’intambara. Niba umusirikare yaraje bakamwereka abakekwa ko bishe abe akabajyamo akabarasa, kandi benshi barabihaniwe, ibyo ni ibyaha by’intambara ntabwo ari umugambi wateguwe.

Abakoze Jenoside nibo bazanye ijambo ‘Double Jenoside’ barikwirakwiza mu nshuti zabo no mu binyamakuru, bavuga ngo nabo barishwe. Ariko niba baranishwe ntabwo ari Jenoside ibyo ni ibyaha by’intambara, hari n’ababihaniwe benshi. N’abatarabihaniwe ni uko hatabonetse ababibaregera kuko ntiwahana umuntu ntawamureze.”

Hon Rutaremara avuga ko abashaka gupfobya bakoze bitwaza ko habayeho Double Jenoside kugira ngo bahishe umugambi wabo wa Jenoside bitiranye ibyaha by’intambara na Jenoside.

Rutaremara yavuze ko RPF-Inkotanyi ku rugamba abasirikare bayo bahaniwe ibyaha by’intambara, ndetse ngo hari n’abahanirwaga gutunga imbunda umuturage gusa, n’abarashwe kubera kwihorera. Ibyo bahanirwaga ngo ni ibyaha by’intambara bakoze ntabwo ari Jenoside bateguye.

Eng. Pascal Hatabazi umuyobozi w’ishuri rya Tumba college of Technology yashimiye Hon Rutaremara ku kiganiro yahaye uru rubyiruko kuri Jenoside benshi batabonye iba ariko babonye ingaruka zayo, avuga ko ibi ari ingenzi kugira ngo n’abato basobanukirwe Jenoside banayitandukanye n’ibyabaye nyuma yayo kandi hagamijwe kwirinda ko yasubira ukundi.

Daddy SADIKI RUBANGURA
UM– USEKE.RW