Sugira Ernest yasabye asaga Miliyoni 75 AS Vita Club imushaka

Ibinyamakuru binyuranye byo muri Repubulika Iharanira Demokarasi ya Congo (DRC) biravuga ko rutahizamu w’Ikipe y’igihugu y’umupira w’amaguru Amavubi, ndetse n’ikipe ya AS Kigali Sugira Ernest yaba ashkishwa cyane n’ikipe ya AS Vita Club.

AS Vita Club yo muri DRC ni imwe mu makipe akomeye mu mupira wo muri icyo gihugu, ndetse no ku mugabane wa Afurika muri rusange.

Sugira Ernest uri ku mwanya wa kabiri n’ibitego 5 ku rutonde rwa ba rutahizamu batsinze ibitego byinshi muri Shampiyona y’u Rwanda 2015/2016.

Uyu musore kandi yanahiriwe n’imikino ya CHAN imaze iminsi ibera mu Rwanda, dore ko yabashije gutsinda ibitego 3, mu mikino 4 u Rwanda rwakinnye.

Ibinyamakuru byo muri DRC biravuga ko AS V.Club bakunda kwita “Dauphins Noirs” y’i Kinshasa iri mu biganiro na Sugira ndetse n’ikipe ya AS Kigali akinira.

Abantu bari hafi muri AS Vita Club ngo babwiye ikinyamakuru Adiac-Congo ko Sugira Ernest yasabye kwishurwa Amadolari ya Amerika ibihumbi 100 (uyashyize mu mafaranga y’u Rwanda asaga Miliyoni 75); Gusa, ngo ubuyobozi bwa AS Vita bukaba bwari bwiteguye gutanga Amadolari ibihumbi 50. Ibiganiro ngo biracyakomeje, kandi biratanga icyizere kuko ngo n’umukinnyi yagaragaje ubushake bwo kujya gukinira Vita, igisigaye gusa ngo ni ukumvikana n’ikipe ye ya AS Kigali yari agifitemo amasezerano.

Sugurira Ernest wazamukiye muri AS Muhanga, akaza kugurwa na APR ariko ntabashe kubona umwanya, ubu niwe uyoboye ubusatirizi bwa AS Kigali iyoboye urutonde rwa Shampiyona y’u Rwanda by’agateganyo.

Sugira bivugwa ko nyuma yo kwitwara neza muri CHAN 2016 ashakishwa n’amakipe menshi, AS Vita Club niyo ngo yagaragaje ubushake cyane. Aramutse agiye muri Vita akitwara neza byamuhesha kwigaragaza ku rwego rwa Afurika, ndetse no kuzamura urwego rwe ku myaka 24 afite aracyafite igihe kinini cyo gukinira Amavubi.

UM– USEKE.RW