Rwanda: Indangagaciro y’igihe duhora tuyivuga ku munwa mu ngiro ntayo

Mu Rwanda kubahiriza igihe bisa n’ibyabaye guca umugani ku manywa ku bantu bamwe ndetse n’inzego za Leta n’abikorera. Umuntu ntatinya kugutumira mu birori runaka cyangwa mu gikorwa yateguye, wahagera ugategereza isaha imwe ikarangira, iya kabiri ikaza ndetse n’iya gatatu ikaba yakwihirika!

Ahanini dukunda kuvuga ko igihe ari amafaranga, ndetse tukanabyubahira ‘Abazungu’ ngo uyu muntu ni nk’ ‘Umuzungu ku gihe’, cyangwa se tuti ‘Umuzungu azi agaciro k’igihe’.

Nyamara, umuntu wese yamenya kandi agashobora kubahiriza igihe, ku mpamvu runaka. Iyo umuntu afite ikizamini cya’akazi hari ubwo utangara ageze aho gikorerwa yarengeje iminota 30 kandi akemererwa gukora bitewe n’uko abamukoresha baba baziranye, cyangwa nabo batubahirije igihe.

Ahenshi nabonye kwirengagiza agaciro k’igihe, no mu bakoresha ibizamini by’akazi narabihasanze, bati ‘ikizamini ni saa tatu zuzuye’ abandi bati ‘buriya ni iz’Abanyarwanda cyangwa iz’Abanyafurica’ koko wahagera saa tatu ukamara indi saha wicaye.

Ibi nabibonye no mu nama zitumizwa n’abayobozi yemwe na babandi twita ba Nyakubahwa, mugategereza umushyitsi mukuru, ibinya bikuzura mu birenge byombi ndetse amavi agahinyagara mutegereje!

Ubwo kuvuga imodoka zacu zitwara abagenzi byo ni ibindi bindi, kuko ho umenya n’ikitwa igihe batakizi, icyo bapfa ni ukuzuza bakibonera cash, iby’uko ushobora kwirukanwa ku kazi kubera gukererwa cyangwa na we ufite ibyo ugiyemo ntubibakangishe batanagutuka cyangwa bakagusohora bati ‘iyo utega moto?’

Ese ko mperuka indangagiciro ari imwe mu byo Leta yigisha Abanyarwanda, bizubahirizwa na nde mu gihe n’abategetsi babiririmba ariko kubyubahiriza bikaba ikibazo?

Birashoboka ko buri wese yakubahiriza igihe?

Yego, birashoboka kuko njya mbibona iyo umuntu afite gahunda yihutirwa azazinduka, nko ku batuye i Kigali ari bujye mu Ntara ku munsi wa gatandatu wa nyuma w’ukwezi, akora iyo bwabaga akagera Nyabugogo kare cyane inkoko ikibika.

Iyo umuntu afite gahunda muri Perezidanse ya Republika ku Kacyiru, usanga akora ibishoboka, umenya n’amababa yayashaka akaguruka ariko akahagera ku isaha kuko aziko nayirenza asanga bashyizeho urugi!

Ibyo rero byerekana ko buri gahunda ufitanye n’umuntu uyihaye agaciro ukamwubaha, kandi haba habaye impinduka ukabimenyesha kare na we ataratanga amafaranga ye aza kukureba byamufasha, agafata izindi gahunda.

Biratangaje kuba watumiye umuntu, yakwitabira ibyo wamutumiyemo ahageze uti ‘gahunda yasubitswe!’ Akikubura yijujuta, agenda akuvumira ku gahera agataha ndetse yazagaruka na bwo ukamukerereza.

Hari ibigo bya Leta udashobora gusanga umukozi mu biro saa munani z’igicamunsi kandi nyamara baruhutse saa sita. Hari n’abagenda bakiryamira, cyangwa bagafata gahunda zabo bwite bikagira ingaruka mbi kuri serivisi bagombaga gutanga.

Iyo imvura yaguye ho ni Nyagasani uba ubonekeye bamwe mu bakozi, ibyo biba urwitwazo, ugasanga aravuga ngo imvura yari nyinshi, kuki utabwira uwo mwari guhura mbere uti ‘ndabona imvura iri bwice ya gahunda reka tuyisubike tuyishyire kuri iyi saha.’

Ibi mvuga ni ibyo njyewe maze kubona, ariko nsanga abayobozi bakwiye gutanga urugero rwiza mu gushyira imbaraga mu kubahiriza igihe, kuko akenshi usanga ari abantu bafite uruhare mu guhindura abandi.

Iyo amakuru ya Radio runaka atabonetse akaza atinze, abanyamakuru babanza kwisegura ku babakurikiye, n’utabikoze abantu bamwibazaho, ariko burya abenshi mu bakunda iyo Radio baba bahangayitse bibaza uko byagenze.

Igihe rero gikwiye kuba igihe, umuntu wese akumva ko akwiye gukora iyo bwabaga ikaha intego, uko muzabigeraho bishobora koroha cyangwa bikagoran kuko intego nyine ni intego, ukora uko ushoboye ukabigeraho.

Kubahiriza igihe bikwiya gutozwa abana batoya bakabikurana, umwana wakerewe agacyahwa, ndetse umwana yatinda gutaha umubyeyi akamubaza icyamitindije kugira ngo uwo muco mubi wo gukerererwa utazamwokama.

Mbona hari hakwiye kujyaho itegeko, abantu bababajwe na kanaka wabatindije ku mpamvu atasobanuye mbere akaba yaregwa agatanga amande. Ibi ahari byatuma buri wese azumva ko atagomba gukinisha igihe.

Ikindi ni uko ku muntu wakererewe mu nama yari akwiye kujya asaba imbabazi, cyangwa ntiyemererwa kwinjiramo kuko, asohowe mu nama kabiri kubera gukrerwa, bishobora kumufasha kwikosora ubutaha akamenya ko nta saa moya y’Umunyarwanda cyangwa iy’Umuzungu ibaho.

HATANGIMANA Ange Eric
UM– USEKE.RW