Nta na rimwe umwana aba muto ku buryo yabura icyo amarira umuryango- Mme J. Kagame

Kuri uyu wa Gatandatu, Madamu Jeannette Kagame yifatanyije n’abaturage bo mu karere ka Rulindo mu gikorwa cy’Umuganda ngarukakwezi, yanatangije gahunda ya ’12+ Program’  yo guteza imbere umwangavu, yasabye abangavu gutangira ibikorwa byo kwiteza imbere bakiri bato kuko ari bwo baba bafite imbaraga zubaka, anatanga ingero z’abana bari guhindura ubuzima bw’imiryango yabo.

Iyi gahunda ya 12+ Program igamije gufasha abana b’abangavu kubakangurira kwizigamira, kugira isuku ku mubiri, ndetse no kumenya uburyo bagomba kwirinda inda zitateganyijwe.

Madamu w’Umukuru w’igihugu yagarutse ku bikorwa by’indashyikirwa byagiye bikorwa n’abana b’abakobwa birimo kuba 80% mu basaga ibihumbi 52 bitabiriye gahunda ya Ni Nyampinga barafashije ababyeyi babo gukora uturima tw’igikoni.

Abandi 63% y’abitabiriye iyi gahunda kandi bayobotse umuco wo kwizigamira mu bigo by’imari n’amabanki, 21% bafunguje Konti, naho abandi 61% bafite ibikorwa biciriritse ariko bibafasha mu mibereho yabo n’iy’imiryango bakomokamo.

Madamu Jeannette Kagame wabanje kwifatanya n’abaturage bo mu murenge wa Shyorongi muri aka karere ka Rulindo, yavuze ko umwana na we agira uruhare runini mu guteza imbere umuryango we n’igihugu. Ati « Nta na rimwe umwana aba muto ku buryo yabura icyo amarira umuryango. »

Madamu wa Perezida, yasabye abangavu bo muri aka gace kiganjemo abatunzwe n’ubuhinzi, kwitabira ubuhinzi bakiri bato, aho yaboneyeho gutanga urugero rw’umwana wo mu karere ka Musanze wiga mu mwaka wa mbere w’amashuri yisumbuye wakoze akarima k’igikoni ubu kakaba gatunze umuryango we kuko basigaye bagemura imboga muri za Hotel.

Ati  « Byafashije umuryango we kwiteza imbere ndetse ntibimubuze no gukomeza amashuri ye, ibikorwa by’aba bana hari aho bivana imiryango baturukamo.»

Avuga kandi ko urubyiruko rwa none rwatinyutse kuko abangavu bagera kuri 34% bagana ibigo nderabuzima kugira ngo basobanuze ibyo baba batazi ku buzima bw’imyororokere.

Muri iyi gahunda yo gukangurira urubyiruko rw’abakobwa kwiteza imbere, mu karere ka Rulindo, abangavu 520 bamaze kuyoboka ibigo by’imari, abandi 884 bibumbiye mu bimina bifasha kwiteza imbere bakiri bato, naho abandi 931 bafashije ababyeyi babo muri gahunda y’imirire myiza bahinga uturima tw’igikoni.

Umuyobozi w’akarere ka Rurindo, Kayiranga Emmanuel yavuze ko iyi gahunda yahinduye byinshi mu buzima bw’abatuye karere abereye umuyobozi.

Ati «  Iyi gahunda tuzafatanya n’ababyeyi bo mu karere ka Rulindo mu kuyisigasira kuko kurinda abana ni kurinda igihugu muri rusange.»

Iyi gahunda ya 12+ ikaba yaragenewe abana bari mu kigero cy’imyaka10-12 mu Rwanda hakaba hari ahantu hizewe 490 (nko mu Ruhongore) aho abana babangavu bajya buri nyuma y’icyumweru bakaganira.

Photos © Evode MUGUNGA/UM– USEKE

Josiane UWANYIRIGIRA
UM– USEKE.RW