Muhanga: Abanyamadini basabye ko Kagame yayobora indi myaka 21

Kuri uyu wa mbere mu nama yahuje  itsinda ry’abadepite  mu Nteko Nshingamategeko,  abayobozi  b’amadini, n’ibigo by’igenga  bikorera  mu karere ka Muhanga,  bamwe muri bo basabye ivugururwa  ry’ingingo y’101  kugira ngo Perezida  Paul Kagame ahabwe manda eshatu z’imyaka irindwi.

Iyi nama yabereye mu karere ka Muhanga igamije  guha abaturage umwanya ngo basobanure impamvu zatumye bandikira Inteko Nshingamategeko bayisaba ko ibafasha kuvugurura  ingingo y’101 isanzwe ibuza Umukuru w’igihugu kongera kwiyamamariza  manda ya gatatu.

Hon Nyirasafari Espérance, umuyobozi w’itsinda  ry’abadepite bari muri iyo nama yabwiye abitabiriye inama ko bagomba gusobanura icyo bashingiyeho  bashaka ko iriya ngingo y’101 ivugururwa.

Avuga ko  n’abatarabonye uburyo bwo  kwandikira Inteko, uyu waba umwanya wo kugira icyo bavuga  kirebana n’iriya ngingo.

Pasiteri Gasana Ernest, Umushumba mu itorero rya Restoration Church mu karere ka Muhanga yabwiye abadepite ko ibyiza Perezida Paul Kagame  yakoze muri iyi myaka amaze ku buyobozi, birimo kubanisha Abanyarwanda, nyuma ya Jenoside yakorewe Abatutsi mu 1994, avana amoko mu ndangamuntu, nta kindi akwiye usibye guhabwa manda y’imyaka 21  kugirango ibyo yasezeranyije Abanyarwanda azabisohoze nta nzitizi  ahuye na zo  zimubuza kwiyamamariza manda ya gatatu.

Pasteri Twagirimana Charles, umuyobozi w’itorero ry’Isezerano rishya yavuze ko  ikibazo cy’amacakubiri mbere ya Jenoside kitari gishingiye mu nzego za leta gusa, ko ahubwo cyari no mu madini n’amatorero  kuko ngo  hari  imyanya  Abatutsi batashoboraga  kujyamo.

Avuga ko ubu  ikibazo cy’irondakoko kitakiriho ko harebwa ubushobozi buri muntu afite bumwemerera kuba yayobora  urwego uru n’uru.

Yagize ati “Abo mbwira ibi ni Abanyarwanda babyumvaga bari hanze, abari mu Rwanda bo barabizi neza ko ikibazo  cy’ivangura cyari cyarahawe intebe, Kagame nahabwe manda y’imyaka 7 inshuro eshatu.”

Muri ibi biganiro kandi  hari abifuje ko  ingingo y’101 yo mu itegeko nshinga ivugururwa, Umukuru w’igihugu agahabwa manda y’imyaka irindwi yikubye inshuro eshanu, noneho uzamusimbura  agahabwa manda y’imyaka itanu.

Nta gitekerezo kinyuranye n’ibi kigeze gitangairwa muri ibi biganiro.

Abayobozu mu idini ya Islam mu karere ka Muhanga bari aha nabo basabye ko Perezida Paul Kagame ahabwa manda y’imyaka irindwi gatatu.

Uretse aba bihaye Imana bo mu ba Porotestanti nta wihaye Imana wo muri Kiliziya Gatolika waje muri ibi biganiro ngo avuge icyo atekereza

Hon Nyirasafari Espérance  yavuze ko  bagiye guhuza ibitekerezo  by’abaturage mu turere twose tugize igihugu  Inteko ikazemeza  ibyavuye mu baturage.

MUHIZI ELISEE
UM– USEKE.RW-Muhanga