Kompanyi yo muri Oman ije gucukura amabuye mu Bisesero ku masezerano ya m39$

Ku mugoroba wo kuri uyu wa kabiri, Kompanyi y’ubucukuzi bw’amabuye y’agaciryo y’Abashoramari bo muri Oman yasinye amasezerano y’ibanze na Leta y’u Rwanda ihagarariwe na RDB n’Umunyamabanga wa Leta ushinzwe ibya mine, y’imirimo y’ubushakashatsi no gucukura amabuye y’agaciro mu Bisesero mu karere ka Karongi. Ni ishoramari rifite agaciro ka miliyoni 39 z’Amadolari ya Amerika.

Iyi Kompanyi yitwa “Tri Metals Mining(Rwanda) ikaba ari ishami rya Mawarid Mining LLC yo muri Oman muri Aziya.

Uyu uzaba ari umushinga wo gucukura Cassiterite (Tin),Niobo-Tantalite (Tantalum & Niobium) na Wolframite (Tungsten) biri mu misozi yo mu Bisesero mu burengerazuba bw’u Rwanda.

Iyi kompanyi yahawe aya masezerano nyuma yo gutsindira isoko, ikazahera ku gukora ubushakashatsi igakurikizaho ibikorwa byo kubaka mine hakazakurikiraho ibijyanye no gucukura byose bikubiye mu masezerano y’imyaka itanu kugeza kuri 20 bitewe n’ibizaba byavuye muri buri kiciro.

Tariq Al Barwani Umuyobozi mukuru Mawarid Mawarid LLC ije muri ibi bikorwa, avuga ko iyi kompanyi izafatanya n’u Rwanda kubyaza umusaruro umutungo warwo( amabuye y’agaciro) ndetse ko igiye guhita itangira gukora ubushakashatsi bugamije kugaragaza andi mabuye y’agaciro yaba ari mu Bisesero.

Leta y’u Rwanda ngo igamije gushyigikira abashoramari b’abanyarwanda n’abanyamahanga bakora by’umwuga ubucukuzi bw’amabuye y’agaciro hagamijwe iterambere ry’ubukungu bw’igihugu nk’uko byatagnajwe na Evode Imena, Umunyamabanga wa Leta ushinzwe ibya Mine muri Minisiteri y’ubutaka amashyamba n’umutungo kamere.

Ubushakashatsi buheruka bwagaragaje ahantu hatandukanye mu Rwanda hakungahaye ku mabuye y’agaciro n’ahandi hagaragaza kuba hafite ubukungu bwinshi mu butaka kurenza uko bitekerezwa.

Hon Imena avuga ko iyi kompanyi ije gushora imari mu Rwanda isanzwe imenyerewe mu bucukuzi bwa Petrol n’amabuye y’agaciro kandi akaba atari ubwa mbere ishoye imari yayo mu Rwanda kuko yakoze mu mushinga wo gucukura Cortan i Nyanza mu bihe bishize.

Francis Gatare umuyobozi mukuru wa RDB avuga ko mu Rwanda hari ahantu henshi hari amabuye y’agaciro kandi u Rwanda rwiteguye guhamagarira abashoramari gushoramo imari bikazamura urwego rw’ubucukuzi mu Rwanda.

Joselyne UWASE
UM– USEKE.RW