Japan yatanze ibiribwa bya miliyoni 1.466 USD byo gufasha impunzi z’Abarundi

*Iyi nkunga irimo toni 147 z’ibishyimbo byose byaguzwe mu Rwanda,
*Ambasaderi wa Japan mu Rwanda ati “N’umuceri w’iwacu uraza vuba aha.”

Ambasaderi w’Ubuyapani mu Rwanda Takayuki Miyashita yashyikirije ishami ry’Umuryango w’abibumbye ryita ku biribwa (WFP/PAM) mu Rwanda inkunga y’ibiribwa bifite agaciro ka miliyoni 165 Japanese Yen (1.466 USD) byo kugaburira impunzi z’Abarundi zicumbikiwe mu nkambi ya Mahama.

Iyi nkunga ya miliyoni 1.466 USD yaguzwemo toni 147 z’ibishyimbo byose byaguzwe mu Rwanda, toni 34 z’amavuta y’ubuto na toni 55 z’ifu y’igikoma yuzuye intungamubiri cyo kugaburira abana n’abagore.

Aya mafaranga kandi yaguzwemo ibindi biribwa n’ibikoresho birimo ibigori, umunyu byose bigiye guhabwa impunzi z’Abarundi zicumbitse mu nkambi ya Mahama.

Ambasaderi w’Ubuyapani mu Rwanda, Takayuki Miyashita avuga ko mu mwaka ushize yasuye iyi nkambi ya Mahama, ndetse ko hashize amezi atandatu igihugu cye gitanze indi nkunga n’ubundi ya miliyoni 1.466 USD yo gufasha ubuzima bw’impunzi z’Abarundi bari muri iyi nkambi.

Avuga ko bakomeje gukurikirana amakuru y’impunzi ziri mu Rwanda n’ahandi ku Isi hose bakumva ko hari icyo bakwiye gukora ku buzima bw’impunzi z’Abarundi ziri mu nkambi ya Mahama.

Ati “ Uyu munsi twishimiye kuba tugiye gutanga iyi nkunga ya miliyoni 1.466 USD agiye gufasha izi mpunzi zitorohewe n’ubuzima, twizeye ko iyi nkunga izunganira imibereho y’izi mpunzi.”

Amb. Takayuki avuga ko mu minsi micye iri imbere igihugu cye kizohereza n’umuceri wo kunganira imibereho y’izi mpunzi z’Abarundi zibarirwa mu bihumbi 55 .

Avuga ko ikibazo gihungabanya ubuzima bw’abantu n’ubuhunzi kiba gikwiye kwitabwaho, akavuga ko igihugu cye gikomeje gushyira ingufu mu bikorwa byo kwita ku mpunzi.

Ati ” N’ubwo hashize igice cy’umwaka dutanze ibindi biribwa byo gufasha izi mpunzi ariko baracyafite ibibazo, ubuzima buracyabagoye, ni yo mpamvu n’uyu munsi twongeye gutanga iyi nkunga.”

Amb. Takayuki ahamagarira ibindi bihugu n’imiryango mpuzamahanga kugira umutima utabara bagatera ikirenge mu cyabo cyo gufasha impunzi.

Umuyobozi w’ishami ry’Umuryango w’abibumye ryita ku biribwamu Rwanda, Jean-Pierre de Margerie avuga uyu muryango ahagarariye ubusanzwe utagira ingengo y’imari ihamye ahubwo ko ibikorwa byawo bishingira ku bwitange bw’ibihungu n’indi miryango mpuzamahanga itabara imbabare.

Avuga ko mu Rwanda hari impunzi z’Abarundi ibihumbi 80 ariko zigiye ziri ahantu hatandukanye, akavuga ko iyi nkunga yo gufasha impunzi ibihumbi 55 zicumbitse mu nkambi ya Mahama hari byinshi igiye kunganira imibereho yazo.

Jean-Pierre de Margerie ukuriye WFP mu Rwanda avuga ko inkunga zigikenewe kugira ngo ubuzima bw’impunzi bukomeze kubungwabungwa, agashimira ubuyapani bwagize uyu mutima kuko n’ubundi iki gihugu gisanzwe ari umuterankunga ukomeye w’uyu muryango.

Martin NIYONKURU
UM– USEKE.RW