Ibiyobyabwenge bifite agaciro ka 19 000 000Rwf byatwitswe

 Ku kimoteri cya Nduba mu murenge wa Nduba mu karere Gasabo ku gicamunsi cyo kuri uyu wa gatanu tariki ya 18 Nyakanga, Polisi y’u Rwanda yatwitse 350Kg  na bule ibihumbi  7 586 by’urumogi ndetse yangiza kanyanga n’izindi nzoga zitemewe byose bifite agaciro ka miliyoni zisaga 19 y’u Rwanda. Ibi ni ibyinshi ni ibyafashwe mu gihe cy’ibyumweru bibiri bishize.­­­­­­­­­­­­

Ingingo ya 594 mu gitabo cy’amategeko ahana y’u Rwanda ahanisha igifungo kuva ku myaka 3 kugeza kuri 5 ufatanywe ibiyobyabwenge ndetse n’ihazabu y’amafaranga kuva ku bihumbi 500 kugera kuri Miliyoni 5.

Abafatanywe ibi biyobyabwenge bari mu maboko ya Polisi ngo ubutabera bukore akazi kabwo nkuko umuvugizi wa Polisi mu mujyi wa Kigali abitangaza. Harimo umugore wafatanywe urumogi mu Gatsata.

Umuvugizi wa Polisi mu mujyi wa Kigali Supt. Modeste Mbabazi yavuze ko ibi biyobyabwenge byafatiwe mu Rwanda ariko ibyinshi bituruka mu bihugu bituranye n’u Rwanda akemeza ko ibi ari ibiba byaciye mu rihumye inzego zishinzwe kubikumira.

Muri ibi byafashwe harimo urumogi rusanzwe rufatwa nk’ikiyobyabwenge mu Rwanda inzoga zizwi nka siriduwire, Super Gin ndetse na Chief Waragi. Supt Mbabazi avuga ko ibi byose ari ibiyobyabwenge bitemewe ndetse  bihanwa n’amategeko y’u Rwanda.

Polisi y’igihugu irakangurira abaturarwanda kwirinda ibiyobyabwenge kuko byangiza ubuzima bw’abantu ndetse n’ubukungu bw’igihugu muri rusange.

Hashimirwa cyane abaturage bafatanya na Polisi mu gutanga amakuru y’ahari ibiyobyabwenge, kubikumira ngo ni abaturage bigirira akamaro kuko bicuruzwa ku bana b’u Rwanda bikabica ubwenge.

Photos/Eric BIRORI/ububiko.umusekehost.com

Eric BIRORI
ububiko.umusekehost.com