Abamugariye ku rugerero bazahabwa miliyoni 400 ku munsi w’amakoperative

Ayo mafaranga azatangwa n’Urugaga rw’amakoperative mu Rwanda (National Cooperatives Confederation of Rwanda), akazahabwa amakoperative atandukanye yashinzwe n’abari ingabo bamugariye ku rugamba rwo kubohora igihugu, ibi ngo bizaba ari ukwesa umuhigo bahize mu mwaka ushize imbere ya Perezida Paul Kagame.

Mu kiganiro n’abanyamakuru cyari kiyobowe na Minisitiri w’Ubucuruzi n’Inganda, Francois Kanimba, yavuze ko umunsi mpuzamahanga wahariwe amakoperative uzizihizwa kuri uyu wa kabiri tariki ya 28 Nyakanga ku nshuro ya 11 mu Rwanda.

Yavuze ko koperative ari umuyoboro mwiza wo guhuza ingufu ku baturage kandi ngo ni n’umurongo w’iterambere ugamije gusangiza inyungu abanyamuryango nta busumbane.

Ibyo ngo nibyo byashingiweho insanganyamatsiko y’uyu munsi igira iti ‘Hitamo koperative uraba uhisemo ubukungu butarimo ubusumbane bwinshi.’

Katabarwa Augustin ukuriye Urugaga rw’amakoperative mu Rwanda, NCCR yavuze ko mu Rwanda umubare w’amakoperative ugeze ku 7500 aho afite abanyamuryango bagera kuri miliyoni eshatu.

Uyu mubare wavuye ku 6500 mu mwaka ushize, icyo ngo ni icyerekana ko Abanyarwanda baha agaciro amakoperative kandi bazi akamaro kayo.

Katabarwa yabwiye abanyamakuru ko mu mwaka ushize ubwo uyu munsi mpuzamahanga wizihizwaga, NCCR yagize amahirwe yo kuwizihizanya n’Umukuru w’igihugu, Perezida Paul Kagame, biyemeza ko bazaremera koperative z’abari abasirikare bamugariye ku rugamba.

Yavuze ko kuri uyu wa kabiri hazabaho guhemba amakoperative yitwaye neza, aho muri buri karere hazaturuka koperative imwe, ku rwego rw’Intara hakava imwe muri SACCOs, nyuma hakazatangwa sheik iriho amafaranga y’u Rwanda miliyoni 400 azashyigikira koperative z’abamugariye ku rugamba.

Bimwe mu bibazo byabajijwe n’abanyamakuru harimo n’icyo kuba abenshi bumva ko Koperative ari umurima bagomba gusaruramo ubukungu ku banyamuryango, ariko ibi ngo si ko bigomba kumera nk’uko Minisitiri Kanimba abivuga.

Minisitiri Kanimba yavuze ko mbere hari uburyo amakoperative yajyagaho nta mategeko ariho, ugasanga uwo ‘muco mubi’ wo kugira koperative akarima abaziyobora bazifata gutyo, n’abaturage bakumva ko ari uko.

Yagize ati “Mbere amakoperative yashyirwagaho n’ubuyobozi, abaturage bakumva ko ari urundi rwego rwa Leta ruri hariya, abantu bakumva ko Atari ayabo, nta ruhare bafitemo. Ubu, uko igihugu kiva mu bujiji, iki kibazo kiragenda gikemuka.”

Mugabo Damien umuyobozi mukuru w’Ikigo cy’Igihugu gishinzwe amakoperative, RCA, yavuze ko kuba inyungu za koperative ziharirwa n’umuntu umwe ari ikibazo kuko ngo iyo koperative iba itabaho.

Umunsi mpuzamahanga w’amakoperative wizihizwa ku Isi hose mu cyumweru cya mbere cy’ukwezi kwa Nyakanga buri mwaka, ariko mu Rwanda ngo ntibyakunze kubera indi minsi mikuru. U Rwanda rwatangiye kwizihiza uyu munsi kuva mu 2005, mu gihe ku rwego rw’Isi watangiye kwizihizwa mu 1995.

Amafoto/HATANGIMANA/UM– USEKE

HATANGIMANA Ange Eric
UM– USEKE.RW