Abadepite ntibumva ukuntu hashyirwaho ikigo kigahabwa inshingano zidafite isano

*Basuzumaga umushinga w’itegeko rishyiraho ikigo RICA cy’ubuzanenge n’ihiganwa mu bucuruzi,
*Hon Ignacienne avuga ko nta handi ku Isi  bahuje ubuziranenge n’ihiganwa mu bucuruzi…

Kuri uyu wa 21 Ukuboza, Abadepite bagize Komisiyo y’ubuhinzi, ubworozi n’ibidukikije batangiye gusuzuma umushinga w’itegeko rishyiraho ikigo ‘RICA’ kizaba gishinzwe kugenzura iyubahirizwa ry’amabwiriza y’ubuziranenge, ihiganwa ry’ubucuruzi no kurengera abaguzi. Aba badepite bagize impungenge ku mikorere y’iki kigo kuko hari ibigo byagiye bihuzwa ntibikore neza ndetse bikaza no gusaba ko byakongera gutandukanywa kubera guhabwa inshingano zidafitanye isano.

Iki kigo ngo kizaba gishinzwe kugenzura iyubahirizwa ry’amabwiriza y’ubuziranenge mu by’ubuhinzi, ubworozi byari biri muri minisiteri y’ubuhininzi n’ubworozi n’ubuvuzi (bw’abantu) bisanzwe bifitwe na Minisiteri y’Ubuzima ndetse n’amabwiriza y’ipiganwa  mu bucuruzi no kurengera umuguzi.

Iki kigo ariko ngo kizaba gishinzwe kugenzura iyubahiriza ry’amabwiriza ashyirwaho n’ibindi bigo nk’ubuziranenge n’amabwiriza y’ihiganwa.

Minisitiri w’abakozi ba leta n’umurimo, Uwizeye Judith avuga ko icyo kigo kizakemura ikibazo cyo gutatanya ishingano zisa wasangaga zikorerwa mu bigo bitandukanye.

Ati “ Ibibazo byagaragaye mu kubahiriza no gukurikiza amategeko yari asanzwe ariho zari inshingano zisa zakorerwaga hirya no hino muri za Minisiteri n’ibigo bya leta kandi bigaragara ko ari inshingano zisa. Byakagombye kuba ziri ahantu hamwe  kugira ngo n’uzikenera ntajye mu nzego za leta zitandukanye ahubwo azisange ahantu hamwe.”

Yavuze ko hagaragaraga ikibazo cy’ibigo byinshi bitandukanye byahuriraga ahantu byose bigiye gukora igenzura rimwe na rimwe n’ahari ikibazo ntubone uwo ukibaza.

Yatanze urugero ku muhinzi w’amatunda nyuma yo gukorwamo umutobe ukawusanga mu iduka nta buziranenge ukabura uwo ubibaza hagati ya MINAGRI, RSB na MINICOM.

Abadepite ariko bagaragaje impungenge z’imikorere y’iki kigo kuko ngo kizaba gihurijwemo ibintu bitandukanye byinshi kandi hari ingero z’ibigo byagiye bishyirwaho nyuma bikagaragaza imbogamizi z’imikorere kuko byabaga byahawe inshingano nyinshi.

Izi ntumwa za rubanda zikavuga ko ikitumvikana ari ukuba iki kigo kizaba kinafite inshingano nyinshi zitanafitanye isano.

Depite Barikana Eugene wifashishije ingero z’ibi bigo, avuga ko hari ibigo byagiye bihuzwa nyuma bikaza kugaragara ko ibyo bikora bidahuye bikaza no gusaba ko byatandukanywa.

Yatanze urugero ku kigo cya RDB cyavutse bahuje ICT na ORTPN none ubu ngo imikoranire yaranze ubu ngo ICT igiye kuvamo.

Izi mpungenge kandi zagaragajwe na perezidante w’iyi komisiyo, Nyirarukundo Ignacienne uvuga ko ari ubwa mbere agiye kubona ikigo gihuza amabwiriza y’ubuziranenge bw’ubunzi n’ubworozi n’ibijyanye n’ipiganwa ry’ubucuruzi no kurengera umuguzi.

Ati “ Niba noneho byemejwe ko ari byo biri bukemure ikibazo dufite bikaza ariko bikaba amategeko abiri atandukanye bigakorerwa ahantu habiri hatandukanye. Hakaba iby’ubuziranenge ubwabyo hakaba n’ibyihiganwa mu bucuruzi no kurengera abaguzi nabyo bikajya ukwabyo.”

Hon Ignacienne avuga ko ikigo nk’iki kiramutse gishyizweho nta handi yaba azi cyabaye. Ati “ Ejo nagerageje gufata umunsi wose nyuma ya saa sita ndasoma ndeba mu mategeko, njya ku Isi yose, Nta hantu na hamwe nasanze barahuje ubuziranenge ukabihuza n’ihiganwa mu bucuruzi no kurengera abaguzi.”

Abadepite bagize iyi komisiyo y’Ubuhinzi; Ubworozi n’ibidukikije bakomeje kunononsora no gukorera ubugororangingo uyu mushinga.

Callixte NDUWAYO
UM– USEKE.RW