USA: Ku myaka 75 basezeranye kuzabana iteka, bapfuye bafatanye mu biganza

Mu mujyi wa San Diego muri Leta ya California, USA, umugabo n’umugore bakundanye kuva bakiri bato bitabye Imana bombi umwe afashe mu biganza by’undi. Umusaza n’umukecuru bari bamaze imyaka 75 babana, aho Jeanette Toczko yari ifite imyaka 96 naho  Alexander Toczko yari afite imyaka 95, ku wa 17-18 Kamena nibwo bitabye Imana bafatanye ibiganza mu gitanda cyabo, mu ntera iri munsi y’amasaha 24.

Dailymail ivuga ko batangiye gukundana bafite imyaka umunani gusa. Muri iki gihe bikundaniraga bisanzwe ariko muri 1940 basezerana kuzabana ibihe byose.

Mu byumweru bike bishize, Alexander Toczko yagize impanuka yitura hasi avunika umugongo bituma ubuzima bwe budakomeza kugenda neza. Umugore na we yari afite uburwayi bwatumaga atabasha gukora imirimo yose yahoze akora.

Kubera urukundo bari bafitanye, bari baranditse ko bifuza kuzitaba Imana bafatanye mu biganza, rwa rukundo bita ‘magara ntusige’.

Ku italiki ya 17 Kamena 2015 Alexander Toczko yapfuye afashe ikiganza cy’umufasha we  Jeannette Toczko amuryamye iruhande.

Umukobwa wabo Aime Toczko –Cushman yasobanuye iby’urupfu ababyeyi be bapfuye bagikundanye bitagereranywa.

Ati: “Yabwiye Mama ko yigendeye!”

 Yahise amuhobera ubwo ahita avuga ati: “Reba ibi ni byo wifuje. Wapfuye umfashe ikiganza. Ndagukunda, ndagukunda, ntegereza nanjye ndaba nje mu kanya.”

Yavuze ko ubwo bamusigaga mu cyumba wenyine ngo asezere ku murambo w’umugabo we bukeye baragarutse basanga na we yapfuye afashe ikiganza cy’umugabo we.

Ba nyakwigendera bari barabyaranye abana 5, abuzukuru 10 ndetse n’abuzukuruza batandatu. Bitabye Imana mbere gato y’uko bizihiza isabukuru yo gushyingiranwa kwabo kwari kuba kumaze imyaka 75.

Bombi bashyinguwe mu irimbi ry’igihugu riri ahitwa Miramar mu mujyi wa San Diego ku wa mbere tariki 22 Kamena 2015.

Iyi nkuru yatinze kumenyekana kubera ubushake bwa bene imiryango, yibukije abantu inkuru y’urukundo yagaragaye muri filime yitwa the Notebook yasohotse muri 2004 igakundwa cyane.

Iyi filime yanditswe kandi ikayoborwa na Nick Cassavetes yasigaye mu mitwe ya benshi bemeje ko yari ikinnye neza kurusha izindi nka Romeo & Juliette na Titanic na zo zigaragaramo urukundo rudasanzwe.

Dailymail

Callixte NDUWAYO
UM– USEKE.RW