Zigama CSS yatangaje ko yakoresheje Miliyari 111 mu 2013

Kimihurura – Mu nama ngarukamwaka kuri uyu wa 21 Werurwe ikigega “Zigama CSS” cyamurikiye abanyamuryango bacyo ibyo cyagezeho, hatangajwe  ko mu mwaka wa 2013  yakoresheje miliyari 111 na miliyoni Magana atanu  avuye kuri miliyari  85 mu mwaka wa 2012. Muri aya yakoreshejwe umwaka ushize inyungu yayo ni miliyari enye.

Iyi  nama ikaba yemezaga  ibyavuye mu mikorere y’umwaka wa 2013, kureba imbogamizi zabayemo no kwemeza  ibizakorwa mu mwaka ukurikiyeho.

Iki kigega cyita ku mibereho y’abanyamuryango kurusha gushaka  inyungu nk’uko byibukijwe muri iyi nama.

Benshi mu banyamuryango ni  abashinzwe  umutekano mu ngabo z’igihugu,Polisi y’igihugu n’abagize urwego rucunga amagereza (RCS), bemeje ko ubu hagiye kujya hitabwa no ku miryango y’abanyamuryango mu rwego rwo gukemura ibibazo bahura nabyo.

Dr James Ndahiro  Umuyobozi w’inama nkuru ya “Zigama CSS” ,  ngo basuzumye uko iki kigega gihagaze basanga ubushobozi bwiyongereye, ndetse avuga ko hari ingamba zitandukanye zafatiwe muri iyi nama harimo no gukomeza kuzamura imibereho y’abanyamurango n’imiryango yabo.

Ati “Nta bibazo byinshi byagaragayemo ahubwo ni ugukomeza umurego kuko mu myaka 16 ikigega kimaze ntikirasubira inyuma. Ubu tuzajya dukorana na za Banki (Agence Banking),tugiye no kujya dufasha abagiriye ibibazo bitandukanye ku mu kazi”.

Mu bibazo byagaragaye, Dr Ndahiro avuga ko harimo ko uburyo abapolisi n’abasirikari bakora imishinga yabo no kuyikurikirana bikiri inyuma.

Ibi ngo bigiye gutuma iki kigo gishyiraho amashami ahatandukanye yo kwigira imishinga  abanyamuryango,  baba bafite inshingano zitoroshye zo kurinda umutekano w’abanyagihugu cyane ko hari ababa barerekeje hanze yacyo mu butumwa bw’amahoro.

Ngo iyi mishinga izajya igirira akamaro umuryango wose aho kureba umuntu ku giti cye .Ibi bizajya bikorwa mu buryo bwihuse,bizajyana no kubafasha kubona inguzanyo mu buryo buhendutse ndetse no kubafasha kugera ku byangombwa by’ibanze(aho kuba n’ibindi).

Inkunga y’ingoboka kubagize ikibazo

Muri iyi nama kandi higiwemo uburyo hazajya hafashwa abasirikari bose bavuye mu gisirikari kubera ubumuga bazajya babishyurirwa inguzanyo bafashe  kugera kuri Miliyoni eshatu (3 000 000),uzajya apfa aguye ku kazi hari imyenda izajya yishyurirwa. Ngo bizajya byigwa neza ku buryo hari abazajya basonerwa.

Byinshi mu bibazo bizajya byigwaho n’inama yashyizweho y’imibereho myiza izajya yiga ibibazo by’abanyamuryango umwe ku giti cye bigafatirwa ibyemezo.

Umuvugizi w’igisirikari cy’u Rwanda Brigadier General Joseph Nzabamwita avuga ko bashimishijwe no kuba mu myaka 16 Zigama CSS yarahereye hasi cyane ikaba ubu igeze ku nyungu ya za miliyari.

Ati“gukora inyungu ya Miliyari enye kandi hitawe ku mibereho y’abanyamuryango n’ikimenyetso kigaragaza ko uburyo twishyize  hamwe twatanga umusaruro kurushaho n’igihugu kitari kutugezaho mu bushobozi bwacyo”

Ikigega ZIGAMA Credit and Savings Society (ZIGAMA CSS) cyaratangiye ngifite intego yo gushakira imibereho myiza abanyamuryango, kubaka iterambere ry’igihugu ndetse no gufatanya n’abandi banyarwanda.

Photos/Eric Birori

BIRORI Eric
ububiko.umusekehost.com