Week end mbi ku Amavubi. Congo 2 – 0 Rwanda

Nyuma y’uko Amavubi y’abatarengeje imyaka 17 atsinzwe ibitego 4 -0 kuwa gatandatu i Kampala, Amavubi makuru nayo kuri iki cyumweru yaguwe nabi i Pointe Noir n’ikipe y’igihugu ya Congo iyatsinda ibitego bibiri ku busa mu mukino ubanza wo gushaka tike yo kujya mu gikombe cya Africa cy’ibihugu kizaba mu 2015 muri Maroc.

Ikipe y’igihugu Amavubi muri uyu mukino wo muri Congo yasatirizaga abakinnyi babiri Sina Jerome na Daddy Birori ariko biba iby’ubusa ntibagira icyo batera mu izamu rya Congo.

Ikipe ya Congo yihariye cyane umukino isatira kenshi cyane kurusha Amavubi, yari yabashije gusezerera ikipe ya Libya mu kiciro cy’ibanze muri aya marushanwa.

Igice cya mbere ariko cyarangiye Amavubi yihagazeho amakipe yombi anganya ubusa ku busa kugeza ku munota wa 71 ubwo uwitwa  Gandze Cesaire yarekuye ishuti ari hanze y’urubuga rw’amahina umuzamu Ndoli ntiyabasha kuwufata.

Mbere gato y’uko umukino urangira, ku makosa ya ba myugariro b’u Rwanda n’umuzamu Ndoli batsinzwe igitego cya kabiri umukino urangira Amavubi asabwa kuzatsinda nibura bitatu ku busa mu mukino wo kwishyura i Kigali mu byumweru bibiri.

Umutoza Steven Philip Constantine nyuma yo gutakaza umukino ubanza,  asanga  bigishoboka ko u Rwanda rwasezerera ikipe y’igihugu ya Congo brazaville kabone nubwo bitoroshye

Constantine ati “ Twatangiye nabi kuko tutabashije kugabanya igitu cy’abakinnyi ba Congo ,twabiganiriyeho mu kiruhuko ariko haje kubaho amakosa abiri y’umukinnyi ku giti cye bituma dutsindwa ibitego bibiri.”

Constantine yanatangaje ko umunyezamu Ndoli J.claude yagize ikibazo cy’imvune ikomeye ku buryo binashoboka ko umukino wo kwishyura uteganyijwe ku itariki 2/08/2014 ashobora kutazawukina.

Kapiteni w’ikipe y’igihugu Amavubi Haruna Niyonzima avuga ko uyu munsi utabahiriye .

Haruna ati “ Uyu munsi ntiwari uwacu twagerageje uko dushoboye ariko n’umusifuzi ntiyatubaniye gusa ndizera ko bitarangiye kuko turacyafite iminota 90 iwacu birashoka ko tuzayivanamo.”

Ikipe y’igihugu y’u Rwanda Amavubi biteganyijwe ko mbere y’uko igaruka mu Rwanda ibanza guca mu gihugu cya Gabon gukina umukino wa gicuti wo kwishyura maze ikahava ije mu Rwanda kwakira umukino wo kwishyura na Congo Brazzaville.

ububiko.umusekehost.com