Ushatse gucika ubutabera, Isasu rikoreshwa nk’imbaraga za nyuma

Muri Gicurasi harashwe uwari umunyamabanga Nshingwabikorwa w’umurenge wa Cyuve mu karere ka Musanze, muri Kanama haraswa uwari akurikiranyweho kuroga bamwe mu bayobozi i Gicumbi barimo n’umusirikare mukuru mu ngabo, kuwa gatandatu ushize harashwe babiri mu bajura bishe umuzamu bakaniba i Muhanga, abarashwe bose baguye aho barasiwe kandi babaga bagerageza guhunga ubutabera nk’uko Polisi y’u Rwanda yagiye ibitangaza. Mu kiganiro n’abanyamakuru kuri uyu wa 08 Nyakanga,  Ministre w’Umutekano abanyamakuru bamubajije kuri iri raswa ry’abanyabyaha.

Ntabwo yabiciye ku ruhande, Minitre Sheikh Musa Fazil Harerimana yavuze ko mu mategeko y’ibihugu byose ku isi habamo kwifashisha imbaraga za  nyuma zishoboka mu gihe ucyekwaho icyaha agerageje gucika ubutabera. Izo mbaraga ngo ni isasu.

Muri iyi nama hagaragajwe ibyagezweho mu mutekano mu mezi atandatu ashize, aho ibyaha byagabanutseho 5% mu gihugu, impanuka mu muhanda n’impfu zizikomokaho nazo zikagabanuka nk’uko byerekanywe mu mibare yagaragajwe.

Ku kibazo yabajijwe n’abanyamakuru ku iraswa ry’abakekwaho ibyaha Ministre Harerimana avuga ko ku muntu wese ucyekwaho icyaha ugerageje gucika ubutabera, imbaraga za nyuma ziba zishobora gukoreshwa na Polisi kandi ibyemererwa n’amategeko.

Yagize ati “mu Bufaransa ntimwumvise uwitwa Mohamed Merah wishe abantu nawe agahita araswa, ko ntawigeze abibazaho se cyangwa ngo agire ikindi abivugaho, n’ahandi n’ahandi hagiye haba nk’ibi.

Ariko mu Rwanda hafatwa umuntu wafatiwe mu bikorwa by’ubugome n’ubwicanyi, agakubitiraho gushaka gucika ubutabera yaraswa bagatangira kuvuga ngo iyo mumufata ku neza mukaganiraaa, ubwo rwose ibyo ni ibiki?”.

Ministre Musa Fazil avuga ko urebye ku isi hose mu bihugu byose hariho itegeko rivuga ko niba umunyacyaha ashatse gucika ubutabera hifashishwa imbaraga za nyuma umuntu afite. Isasu ngo nizo mbaraga za nyuma urinda ukekwaho icyaha aba afite.

Yongeraho ko kandi nta gihugu na kimwe gikwiye kubigarukaho cyangwa ngo kigire icyo kibivugaho kuko hari n’ibihugu bikomeye ndetse byiyita ko bikurikiza amategeko birasa abakekwaho ibyaha kenshi mu buryo butandukanye.

Muri iki kiganiro n’abanyamakuru Ministeri y’umutekano yatangaje ko abantu bagera kuri 44 baherutse gutabwa muri yombi mu turere twa Rubavu, Nyabihu, Musanze na Rusizi bakekwaho gukorana n’umutwe wa FDLR mu bikorwa by’iterabwoba.

Perezida Kagame aherutse gutangaza ko inzego z’umutekano zitazihanganira uwo ariwe wese uzashaka guhungabanya umutekano n’umudendezo by’u Rwanda ndetse ko imbaraga zishoboka zose zizifashishwa kugira ngo amahoro n’umutekano by’abaturarwanda bikomeze bisugire.

Martin NIYONKURU
ububiko.umusekehost.com