U Rwanda ntiruratezuka ku mushinga wa Gariyamoshi Kenya – Kigali

Minisitiri w’Imari n’Igenamigambi Amb. Claver Gatete arahakana amakuru avuga ko u Rwanda rwamaze gufata umwanzuro wo kuva mu mushinga wa Gariyamoshi y’umuhoora wa Ruguru uzaturuka Mombasa muri Kenya ukagera i Kigali.

Uyu mushinga umaze imyaka itatu kuko wumvikanyweho n’ibihugu by’u Rwanda, Uganda na Kenya mu mwaka wa 2013, usa n’utarasobanuka neza igihe uzagerere mu Rwanda dore ko havugwamo ibibazo by’ubushobozi no kuba Uganda ngo ishaka kuzawubaka iwerekeza ku mupaka wa Sudani y’Epfo aho kuwerekeza ku mupaka w’u Rwanda.

Kuwa kabiri, ibinyamakuru byo muri Kenya byatangaje ko u Rwanda rwikuye muri uyu mushinga kuko uzaruhenda, kandi ukaba ushobora kuzatinda cyane.

Ahubwo ngo rukaba rugiye gushyira ingufu ku muhanda wa Gariyamoshi wo mu muhora wo hagati uva Tanzania ukagera mu Rwanda (Dar es Salaam-Isaka-Kigali).

Ubusanzwe, hejuru ya 70% by’ibicuruza biva n’ibiza mu Rwanda biviye mu mahanga binyura ku cyambu cya Dar es Salaam.

Guhitamo umuhanda wa Gariyamoshi wo mu muhora wo hagati ariko, ngo binafitiye inyungu u Rwanda kuko wo udahenze cyane kandi ukaba ariwo ushobora kurangira vuba, nko mu mwaka wa 2018.

Ikinyamakuru Nation cyo muri Kenya cyatangaje ko Minisitiri w’Imari n’Igenamigambi w’u Rwanda Ambasaderi Claver Gatete yavuze ko ‘u Rwanda rwahisemo guhindura amayira, rukihuza n’inyanja ya Oseyaniya runyuze ku cyambu cya Tanzania kuko ariho hahendutse kandi bugufi’.

Gusa, Amb. Claver Gatete yahakaniye Umuseke aya makuru, avuga ko bamwumvise nabi.

Ati “Sinigeze mvuga ko Guverinoma y’u Rwanda yahisemo umuhanda umwe kandi sinzi aho babikuye. Navuze ko dukeneye imihanda ya Gariyamoshi yombi, uwo mu muhora wa ruguru kimwe n’uwo mu muhora wo hagati, nk’uko dukeneye ubucuruzi bunyuze mu mihora yombi.”

Umuyobozi muri Minisiteri y’imari utashatse ko amazinaye atangazwa, yabwiye Umuseke ko ibinyamakuru byo muri Kenya byari bikwiye kwitondera gutangaza amakuru nk’ariya kuko ashobora guteza ibibazo bya Politike hagati y’ibihugu byombi no mu mishinga bifitanye.

Minisiteri ishinzwe ibikorwa by’umuryango wa Afurika y’Iburasirazuba (MINEAC) ivuga ko hari inyigo yagaragaje ko Umuhanda wa Gariyamoshi uturuka Tanzania watwara u Rwanda Amadolari ya Amerika ($) ari hagati ya Miliyoni 800 na 900, uturuka Kenya wo warutwara asaga Miliyari y’Amadolari.

Muri rusange, umushinga wose Mombasa-Kigali ukaba uhagaze Miliyari 13 z’Amadolari, Kenya ikaba yaratangiye kubaka uruhande rwayo.

Vénuste KAMANZI
UM– USEKE.RW