Twahirwa wigeze gukatirwa urwo gupfa, yaburaniye i Rukumberi aho yakoreye ibyaha

Ngoma – Mu gitondo cyo kuri uyu wa gatanu, icyumba cy’Urukiko rw’ibanze rwa Sake kimaze kuba gito ku baturage bari kuza gukurikirana iburanishwa rya Francois Twahirwa wari warahamijwe n’inkiko uruhare rutaziguye mu bwicanyi bwakorewe Abatutsi mu cyahoze ari Komini Sake yigeze kubera Burugumestre ndetse agakatirwa urwo gupfa. Iburanisha uyu munsi niho ryatangiye kubera.

Urugereko rwihariye rw’Urukiko Rukuru ruburanisha ibyaha mpuzamahanga n’ibyambukiranya imbibi ruri kuburanisha ubujurire bwa Twahirwa rwanzuye ko uyu munsi kuwa gatanu urubanza rubera i Sake. Kugeza saa yine n’igice, uruhande rw’uregwa, ubwunganizi, abashinjacyaha n’abacamanza bari bahageze.

Uyu munsi byari biteganyijwe ko humvwa abatangabuhamya icyenda basigaye ku ruhande rw’abashinjura uregwa n’abamushinja.

Twahirwa wakoraga mu biro by’umukuru w’igihugu mu 1994,  mu 1999 Urukiko rwisumbuye rwa Kibungo rwari rwamukatiye igihano cy’urupfu kiza gusimburwa n’igifungo cyo gufungwa burundu nyuma y’aho iki gihano cy’Urupfu kivanywe mu mategeko ahana y’u Rwanda.

Uyu mugabo yari yarahamijwe  uruhare rutaziguye mu bwicanyi bwakorewe Abatutsi, kwangiza no gusahura imitungo mu cyahoze ari Komini Sake ubu ni mu murenge wa Sake ari naho iburanishwa ryajyanywe. Igihano yakatiwe kiriya gihe nicyo ubu ari kujuririra.

Hagati y’umwaka w’1983 n’1987; Twahirwa yabaye Burugumesitiri wa komini Sake mbere yo gukora mu biro by’umukuru w’igihugu kugeza mu 1994.

Kugeza saa yine n’igice z’igitondo icyumba cy’iburanisha cyari cyamaze kuzura, no hanze hari abantu batari bacye bo mu mirenge ya Sake na Rukumberi bose baje gukurikirana uru rubanza rw’uyu mugabo uzwi cyane muri aka gace.

Umunyamakuru w’Umuseke uriyo arakomeza gukurikirana iburanisha….

Elia BYUK– USENGE
UM– USEKE.RW