Tunisia: Imodoka y’abarinda Umukuru w’igihugu yaturikanywe n’igisasu

Mu ijoro ryo kuri uyu wa Kabiri mu Murwa mukuru wa Tunisia,  Tunis haraye haturikiye igisasu ku muhanda witiriwe Umwami Mohammed V gihitana ingabo zirinda mukuru w’igihugu na bamwe mu bagenzi bari hafi aho bose. Imibare yerekana ko igisasu cyahitanye abantu 12 hakomereka abandi 20.

Umukuru w’igihugu Béji Caid Essebssi yahise ashyiraho ibihe bidasanzwe bizamara iminsi 30 kandi ngo nta muntu wemerewe gutembera mu mujyi rwagati guhera sas satu z’ijoro kugeza sa kumi n’imwe za mu gitondo.

Ababibonye bavuga ko imodoka yari iparitse kuri metero 200 hafi ya Minisiteri y’Ubutegetsi bw’igihugu, yaturikiyemo igisasu ubwo imodoka itwara abasirikare barinda umutekano wa Perezida wa Tuniziya yari iciye hafi aho.

Amakuru atangwa n’umwe mu bakozi muri iyi Minisiteri avuga ko mu modoka harimo abasirikare 25 bari bagiye ku kazi. Muri bo ngo abarenga 10 bahasize ubuzima.

Abanyamakuru bahise bahasesekara ariko basanga umuhanda wafunzwe. Abakomeretse boherejwe mu bitaro bya gisirikare bya Tunis ndetse n’ibya Police biri ahitwa Marsa.

Jeune Afrique ivuga ko iki ari igitero cy’iterabwoba cya gatatu kigabwe kuri Tunisia nyuma y’icyagabwe ku nzu ndangamurage ya Bardo n’ahitwa Kantaoui.

Ku wa Gatanu w’icyumweru gishize, Police yaburijemo igitero cyari cyateguwe n’umwiyahuzi wari wambaye ibisasu biturika. Muri iki gihugu bafite ubwoba ko ibitero by’abiyahuzi bigambiriye kuzivugana Umukuru w’igihugu.

Jean Pierre NIZEYIMANA
UM– USEKE.RW