Tugomba kugarura Perezida Kagame kuri stade – Haruna

Perezida Paul Kagame mu kiganiro yagiranye n’abanyamakuru mu mezi abiri ashize yagaragaje gucika intege ku ikipe y’igihugu Amavubi idatanga umusaruro ugaragara. Haruna Niyonzima kapiteni w’ikipe y’igihugu Amavubi, mu kiganiro yagiranye n’umunyamakuru w’imikino Gakuba Abdoul Jabar yamubwiye ko bari gukora ibishoboka ngo bamugarure ku kibuga kubashyigikira.

Haruna Niyonzima yavuze ko bishimisha iyo umubyeyi yaje kugushyigikira mu kazi ukora, ibi ngo bitera morale kuko umuntu aba adashaka ko umubyeyi agenda ababaye.

Haruna avuga ku ruhande rw’abakinnyi babiganiraho, n’ubwo ngo akenshi mu mupira w’amaguru byanga, ariko ku mutima baba babitekerezaho nk’ikipe ko ari inshingano zabo gushimisha abanyarwanda n’umukuru w’igihugu.

Ati “Natwe tubiganiro tukavuga tuti murabona tumaze igihe tutabona Perezida wacu kuri stade, natwe hari ikintu bidutera, hari akababaro bidutera, kuko Perezida wacu ari mu ba perezida muri Africa bakunda umupira na siporo muri rusange kandi babigaragaza.

Akaba ariyo mpamvu iyo tutakoze neza ngo yishime ngo dushimishe n’abanyarwanda natwe ubwacu ku mutima biratubabaza. Akaba ariyo mpamvu tugiye gukora ibishoboka byose tukazamubona yenda muri match zikurikiraho yaje kudushyigikira.”

Usibye na Perezida Kagame, abanyarwanda batandukanye bagiye bagaragaza kutanyurwa n’umusaruro w’ikipe y’igihugu Amavubi kubera kutitwara neza mu mikino mpuzamahanga.

Amavubi ariko mu mezi atanu ashize yegerageje kwihagararaho kuko ubu ageze mu kiciro cya nyuma cy’amatsinda yo gushaka tiket yo kujya mu gikombe cy’Africa cya 2015 muri Maroc. Kugirango agere aha yasezereye bitoroshye ikipe ya Libya na Congo Brazzaville.

Mu myaka ibiri ishize mu mikino 24 yemewe na FIFA Amavubi yakinnye yatsinzemo imikino irindwi (7) gusa, yanganyijemo imikino itandatu (6), itsindwa imikino 11.

Mu mikino itanu (6) Amavubi amaze gukina muri uyu mwaka yatsinzemo itatu (3) itsindwa rimwe inganya kabiri.

Imikino yemewe na FIFA Amavubi aheruka gukina mu myaka ibiri ishize:

20/07/2014         Pointe Noire      Congo  2 – 0  Rwanda
27/07/2014         Libreville              Gabon 0 – 1  Rwanda
02/08/2014         Kigali      Rwanda 2 – 0   Congo
18/05/2014         Rades    Libya              0 – 0 Rwanda
31/05/2014         Kigali      Rwanda               3 – 0        Libya
05/03/2014         Bujumbura         Burundi               1 – 1        Rwanda
16/11/2013        Kampala               Uganda               0 – 0        Rwanda
29/11/2013         Machakos           Uganda               1 – 0        Rwanda
02/12/2013         Nairobi Sudan  1 – 0        Rwanda
05/12/2013         Machakos           Rwanda               1 – 0        Eritrea
07/12/2013         Mombasa            Kenya  1 – 0        Rwanda
14/07/2013         Addis Ababa       Ethiopia               1 – 0        Rwanda
27/07/2013         Kigali      Rwanda               1 – 0        Ethiopia
14/08/2013         Kigali      Rwanda               0 – 1        Malawi
08/09/2013         Porto Novo         Benin   2 – 0        Rwanda
09/06/2013        Bamako                Mali      1 – 1        Rwanda
16/06/2013         Kigali      Rwanda               0 – 1        Algeria
06/02/2013         Kigali      Rwanda               2 – 2        Uganda
20/03/2013         Kigali      Rwanda               0 – 1        Libya
24/03/2013         Kigali      Rwanda               1 – 2        Mali
14/11/2012        Kigali      Rwanda               2 – 2        Namibia
26/11/2012         Kampala               Rwanda               2 – 0        Malawi
01/12/2012         Kampala               Eritrea  0 – 2        Rwanda
03/12/2012         Kampala               Rwanda               0 – 2        Tanzania

U Rwanda ubu mu guhatanira kujya mu gikombe cya Africa 2015 ruri mu itsinda A hamwe na Nigeria, South Africa na Sudan. Imikino yo guhatana izatangira Nigeria yakira u Rwanda muri week end ya tariki 5 – 7 Nzeri 2014, ni mu byumweru bitatu gusa.

Roger Marc Rutindukanamurego
UM– USEKE.RW