Tigo yatangiye guha abafatabuguzi bayo internet ya 4G kuri Telefone

Mu nama mpuzamahanga ku ikoranabuhanga ‘Transform Africa’ ubuyobozi bwa bw’ikigo ‘Millicom’, n’abayobozi batandukanye mu nzego z’umubuyobozi mu Rwanda batangije ku mugaragaro gahunda y’ikigo cy’itumanaho cya Tigo-Rwanda igamije guha abafatabuguzi bayo bose babyifuza Serivise za Internet yihuta ya 4G kuri Telefone zigendanwa.

Umuhango wo gutangiza iyi gahunda wari wanitabiriwe na Minisitiri w’urubyiruko n’ikoranabuhanga Jean Philbert Nsengimana; Zhao Zoulin,Umunyamabanga Mukuru w’ihuriro mpuzamahanga ku ikoranabuhanga (ITU); Cynthia Gordon, umuyobozi mukuru wungirije w’ikigo Millicom cya nyiri Tigo ishami rya Afurika; Patrick Yon, umuyobozi wa Olleh Rwanda Networks; Francis Gatare, umuyobozi wa RDB; n’abandi banyacyubahiro.

Gahunda nshya Tigo-Rwanda yatangije izafasha buri umwe wese ufite Telefone igezweho ‘Smartphone’ ifite ubushobozi bwo kwakira 4G kuba yabona “Sim card” imwemerera gukoresha internet ya 4G kuri Telefone ye igendanwa. Iyi “Sim Card” ya 4G iragura amafaranga y’u Rwanda 1 000 ku byicaro byose bya Tigo.

Cynthia Gordon, Umuyobozi mukuru wungirije w’ikigo Millicom cya nyiri Tigo ishami rya Afurika yavuze iyi gahunda yatangijwe mu Rwanda iri mu mugambi wa Tigo wo kuzamura ikoranabuhanga mu mibereho y’Abanyafurika kugira ngo barusheho kubana no gukoresha ikoranabuhanga, ndetse ngo bigamije kurushaho guha Serivise nziza abafatabuguzi babo.

Ati “Nishimiye kuba ndi mu Rwanda kugira ngo nibonere udushya tuganisha ku mpinduka zishingiye ku ikoranabuhanga.”

Kuva internet yihuta cyane ya 4G yagera mu Rwanda, abantu bayikoreshaga ahanini ni abafite ‘modem’ n’ibindi bikoresho byabugenewe.

UM– USEKE.RW