Rwanda: Abahanzi ngo nibareke ibihangano bitesha agaciro abagore

*Hanenzwe zimwe mu ndirimbo zabo zigaragaramo abakobwa bambaye ubusa,
* Indirimbo “Ikiryabarezi” yatunzwe urutoki na nyirayo ahari
*Hamwe na GMO biyemeje kwimakaza ihame ry’uburinganire,…

Uyu munsi, mu kiganiro nyunguranabitekerezo cyahurije hamwe abahanzi mu mpano zitandukanye, abakora mu rwego rwa Sport, Abanyamakuru n’Urwego rw’Igihugu rushinzwe kugenzura ihame ry’Uburinganire (GMO), bimwe mu bihangano by’abahanzi byatunzweho agatoki gutesha agaciro abagore no kwimakaza ihohoterwa ribakorera, gusa nabo bavuga ko Leta na yo ntacyo iba yakoze ngo itange imirongo ngerwaho.

Ingabire Marie Immaculee wari watumiye nk’uhagarariye abarwanya ihohoterwa n’akarengane, yavuze ko bimwe mu bihangano by’abahanzi bitesha agaciro abagore/abakobwa.

Uyu muyobozi wahise atunga agatoki Ama G The Black, witabiriye ibi biganiro, yagize ati “ Buriya araza kudusobanurira icyo Ikiryabarezi icyo bivuze…”

Ingabire Marie Immaculee avuga ko benshi mu bahanzi b’iki gihe batesha agaciro abagore kuko bamugaragagaza nk’igikoresho cyo kunezeza abantu.

Ati “Ntabwo mujya mugaragaza umugore nk’umuntu uzi ubwenge…aragaragara neza, ateye neza, yambaye neza agize gute’ (yavugaga ibyo bibandaho), ibyo nta n’icyo bimarira Umunyarwanda.”

Uyu muyobozi usanzwe ayobora Transparency International Rwanda avuga ko iri hohoterwa rikorerwa abagore mu bihangano atari irya vuba ahubwo kuko n’abahanzi bo hambere bakunze guhanga ibihangano byimakazaga ihohoterwa rikorerwa abagore by’umwihariko mu makinamico.

Ngo abahanzi ba none na bo bakomerejeho. Ati “ Uramuhohotera cya gihe isura ye wayangije, cya gihe umushyira mu gihangano cyawe yambaye ubusa.

Yakomye urusyo yubura n’ingasire, agaruka no kuri aba bakobwa bemera gukorerwa iri hohoterwa.

Ati “Yego murafatanya (umukobwa washyizwe mu mashusho) ariko na we ntukwiye kumutiza umurindi, tuve muri bya bindi ngo usenya urwe umutiza umuhoro, tujye muri gahunda y’intore zatojwe zivuga ngo ushaka gusenya urwe bamwambura umuhoro.”

Umuhanzi Nyabyenda Narcisse uzwi cyane mu kuba umutoza w’abakinnyi b’Ikinamico, avuga ko umuhanzi ahanga agendeye ku bigaragara mu muryango mugari w’icyo gihe.

Yatanze urugero rw’ikinamico yitwa UWERA, avuga ko yagiye gusura aka gace kavugwamo ibyakinwe muri uyu mukino agasanga bijyanye n’ibihakorerwa.

Umuhanzi w’Umwanditsi Kalisa Rugano avuga ko ibi bishinjwa abahanzi byo gutatira umuco no kwimakaza ihohoterwa rikorerwa abagore/abakobwa bitizwa umurindi no kuba Leta ishinzwe kugenzura umuryango mugari ntacyo iba yakoze ngo itange urugero rw’ibikenewe gukorwa.

Rugano wasabaga abayobozi bari muri ibi biganiro, yagize ati “ Ni mwe muturebera, muri ijisho rya rubanda natwe tukabwira rubanda, nimuduhe ingingo mubona ko zikenewe kugira ngo zidufashe kubaka igihugu, abantu bazandikeho, bazibyine, baziririmbe, abantu bazogeze.”

Uyu muhanzi uvuga ko umuhanzi akorera mu murongo w’Ubutegetsi bw’igihugu ke agiteza imbere, avuga ko abahanzi bahanga ibyo baba babonye mu baturage kandi ko leta ari yo iba ikwiye kwigisha abaturage bayo.

Avuga ko ubuyobozi buramutse bwigishije abana b’igihugu bahinduka bityo n’abahanzi bagahindura ibyo bahanga.

Agarukaga ku mateka agomba kwigishwa aba, ati “ Aba bana babimenye ntabwo bajya mu mafilimi y’iyo, ntibajya mu bitabo by’iyo, ntibajya mu ndirimbo z’iyo, bamenya ibyabo…Ndemeranya na byo.”

Ibindi bitekerezo byatanzwe n’abahanzi batandukanye biyemeje gufasha Leta kwimakaza ihame ry’uburinganire bw’abagore n’abagabo mu iterambere ry’igihugu no guhanga ibihangano birwanya ihohoterwa rishingiye ku gitsina.

Umugenzuri mukuru wungirije muri GMO, Kabera Jean Paul avuga ko ibi byiciro bitatu (abahanzi, itangasazamukuru na Sport) bifite ijambo mu muryango nyarwanda bityo ko ubu bufatanye biyemeje ntakabuza buzatanga umusaruro.

Martin NIYONKURU
UM– USEKE.RW