Rusizi/Nyamasheke: Abaturage bavuga iki ku bumwe n’ubwiyunge?

Abaturage bo mu turere twa Rusizi na Nyamasheke mu Ntara y’Iburengerazuba bavuga ko abarokotse Jenoside yakorewe Abatutsi na bamwe bafite imiryango yayigizemo uruhare, imibanire yabo imeze neza ubu mu gihe byari bikomeye mbere y’umwaka wa 2003.

Nkusi Gregoire w’imyaka 64, utuye mu kagali ka Cyangugu umurenge wa Kamembe avuga ko nyuma yo kwicirwa abavandimwe be barindwi yababariye abamwiciye nubwo hari abataza kumusaba imbabazi.

Agira ati: “Njyewe sinzi impamvu hakiri abinangira imitima, nyamara twe twarokotse Jenoside twiteguye kubabarira tukabana. Nibareke ipfunwe baze twubake u Rwanda, dufatanye na Leta y’u Rwanda y’Ubumwe.”

Avugako nk’abacitse ku icumu, hakiri ikibazo cy’uko hari abantu babo batarabona, ati “Turasaba ko abafite amakuru, batubwira aho bashyize abacu tubashe kubashyingura mu cyubahiro.”

Nteziryayo Theogene w’imyaka 60 avuga ko ubu babyina amahoro nk’abarokokeye ahitwa kuri Stade ya Rusizi yitwaga Kamarampaka. Aha hiciwe abantu benshi ngo ababahigaga babifashijwemo na Bagambiki Emmanuel wayoboraga Cyangugu.

Ati: “Nabuze abantu 17 bitewe n’ubuyobozi bubi, nyamara uyu Bagambiki yari afite ubudahangarwa.”

Nteziryayo avuga ko ahitwa mu Gatandara kwa Mvuningoma Daniel, bicaga abantu muri Jenoside yakorewe Abatutsi bakarya imitima yabo.

Nyuma y’iyo nzira uyu musaza yita iy’umusaraba, avuga ko ubu bamaze kwiyakira.

Agira ati: “Muri gacaca twarahabohokeye kuko twagiye tumenya amakuru y’abacu bishwe mu gihe cya Jenoside ariko n’abataraboneka tuzababona tubashyingure mu cyubahiro. Ubu turashimira Leta y’Ubumwe yahagaritse Jenoside ikomeze isagambe.”

Akomeza agira ati “Ubu twarongeye turasabirana abageni, gusa turasaba Leta ko yadufasha hari abana bavutse nyuma ya Jenoside ba se bishwe, aba bana bari mu nda bataravuka, babafashe kwiga kuko hari abatiga kubera ko nta bushobozi.”

Sibomana Emmanuel wagize uruhare muri Jenoside yafunzwe imyaka isaga icyenda, we yemeze ko ari imbabazi Leta yamugiriye nyuma yo kwemera ko yagize uruhare muri Jenoside.

Ati: “Njyewe nasabye imbabazi nkitabira gahunda za Leta, ndagaya abagitsimbaraye banze gusaba imbabazi nyamara Paul Kagame yaradusoneye, kandi sinarimbikwiye.”

Abarotse Jenoside muri utu turere twa Rusizi na Nyamasheke bavuga ko bashaka kubaka ejo habo heza bakabana neza n’ababiciye ababo muri Jenoside mu 1994.

Francois Nelson NIYIBIZI
UM– USEKE.RW/RUSIZI-NYAMASHEKE