Rubavu: BRALIRWA na EAP batanze miliyoni 3 Frw ya Mutuelle z’abantu 1000
Bishyuye miliyoni 3 za Mutuelle de sante z’abantu 1000
Mu bikorwa bibanziriza irushanwa rya Primus Guma Guma Super Star rigiye kuba ku nshuro ya Gatandatu (PGGSS6) uruganda rutunganya ibinyobwa bisembuye n’ibidasembuye BRALIRWA rutegura iri rushanwa rwatanze miliyoni 3 Frw zo kwishyura imisanzu y’ubwisungane mu kwivuza bwa Mutuelle de Sante y’abantu 1 000 bo mu murenge wa Nyamyumba mu karere ka Rubavu.
BRALIRWA isanzwe ifatanya na EAP (East African Promoters) muri iri rushanwa bakoze iki gikorwa bari kumwe n’abahanzi 10 bazahatana muri iri rushanwa rya PGGSS6.
Umuyobozi waje ahagarariye umurenge wa Nyamyumba yavuze ko uru ruganda rwa BRALIRWA rusanzwe ari abafatanyabikorwa b’imena b’akarere ka Rubavu kuko rufatiye runini aka karere kubera gutanga imirimo itandukanye ku kicaro cyarwo.
Abahanzi 10 bari mu irushanwa rya PGGSS6 bahise berekeza ku ishuri rya Muzika i Nyundo basogongezwa ku mpano zo kuririmba z’abana biga muri iri shuri.
Muri iri shuri rya Nyundo ni naho havuye itsinda rizafasha aba bahanzi mu bikorwa by’iri rushanwa biteganyijwe gutangira muri Gicurasi.
Mushyoma Joseph uhagarariye EAP yavuze ko iri shuri ari ikitegererezo muri muzika nyarwanda ndetse ko ryaziye igihe kugira ngo abafite impano zo kuririmba babashe kuzigaragaza no kuzagura.
Photos ©E. MUGUNGA/Umuseke
Evode MUGUNGA
UM– USEKE.RW
English