RSSB imbere ya PAC yabajijwe iby’abakozi bajya muri “Pansiyo” bagasanga nta musanzu batangiwe

*Miliyari 16 Frw abakozi bizigamira abakoresha ntibayagejeje muri RSSB, 45% by’aya ni aya Kaminuza
Abadepite bashinzwe gukurikirana imikoreshereze y’imari n’umutungo wa Leta (PAC) bababajwe no kuba hari abakozi bakatwa amafaranga y’ubwiteganirize ku mishahara, ariko ntagezwe mu kigo cy’ubwiteganyirize (RSSB). Gatera Jonathan yavuze ko n’ubu hari abakozi bajya mu kiruhuko k’izabukuru bajya kubaza “Pansiyo” bagasanga nta yatanzwe kandi buri kwezi barayakatwaga.

Abayobozi b’ikigo cy’ubwiteganyirizwe bw’abakozi (RSSB) kuri uyu wa kabiri bari bitabye PAC ngo basobanure amakosa y’imicungire n’imikoreshereze mibi y’imari yagaraye muri iki kigo muri Raporo y’Umugenzuzi Mukuru w’Imari ya Leta ya 2016/2017.
Bagarutse ku mafaranga agera kuri miliyari 16 y’imisanzu y’abakozi ariko ubu atagezwa muri iki kigo kandi buri kwezi abakozi bayakatwa n’abakoresha babo.
Gatera Jonathan uyobora RSSB yavuze ko ayo mafaranga amenshi afitwe n’ibigo bya Leta, kuko ngo byo RSSB itabona uko ibyishyuza ku gahato nk’uko bigenda ku bigo by’abikorera.
Yavuze ko Kaminuza y’u Rwanda (UR) iri mu bafite umwenda munini andi akaba ayo mu bingo bifite isura ya ‘diplomacy’ nk’ibigo bitari ibinyarwanda.
Yagize ati: “Ayo mafaranga amenshi afitwe n’ibigo bya Leta, buriya kuri ziriya miliyari 16 Frw, 45% ni Kaminuza y’u Rwanda iyafite. Abandi harimo n’ibigo bifite ubudahangarwa ‘diplomatic’, bigera hafi 30%.”
Iki kibazo ngo kigaragara muri izi nzego ebyiri kuko ngo mu nzego z’abikorera ho RSSB ijya mu nkiko igakoresha amategeko bagateza cyamunara.
Gusa ngo mu nzego za Leta n’ibyo bigo bitaba ari ibyo mu Rwanda biragorana kuba ubwo buryo bwakoreshwa.
Gatera avuga ariko ko mu nzego za Leta ubu hari gahunda bemeranyijwe na Minisiteri y’Imari n’Igenamigambi (MINECOFIN) y’uburyo izo nzego zigiye kujya zishyura ariko ngo bizatwara agihe.
Abadepite bagize Komisiyo ya PAC, bavuze ko ari ikibazo gikomeye kandi kiba kibangamiye umukozi kuko ngo akatwa amafaranga yiteganyiriza. Ngo kuba adateganyirizwa kandi we yabikoze,  kandi we iyo atabikoze ashobora no kubihanirwa ni ikibazo.
Depite Karenzi Thoneste Visi Perezida wa Komisiyo yagize ati: “Ariko urumva ni jyewe ubihomberamo nk’umukozi. Ibyo bigo byaba ari ibiri ‘diplomatike’, byaba ari za Kaminuza y’u Rwanda, nk’umukozi ni jyewe ubihomberamo. Kuko amafaranga yanjye ntabwo atangwa kandi baba bayankase buri kwezi.”
Umuyobozi wa RSSB  Gatera Jonathan yavuze ko ari ikibazo gikomeye cyane kuko ngo hari abakozi bajya mu kiruhuko cy’izabukuru yarakatwaga amafaranga buri kwezi ariko ngo yajya kureba “Pansiyo” agasanga nta musanzu we wigeze utangwa.
Gatera ati: “Ibyo uvuga ni ukuri, ni ikibazo. Kuko n’ubu ngubu  hari ugera mu gihe cya Pansiyo akaba ari uje gufata Pansiyo agasanga nta musanzu “Contribution” wigeze utangwa.”
 Avuga ko RSSB ifite inshingano ihabwa n’itegeko yo gukurikirana uwari umukoresha kuko bajyenda bakamutereza cyamuranara ariko ngo iyo bigeze mu nzego za Leta n’iziri diplomatic biragorana.
Perezida wa komisiyo ya PAC, Hon Nkusi Juvenal avuga ko MINECOFIN ishinzwe guhemba abakozi, ko iba ikwiye kubibazwa. Kuko ngo ihemba abakozi ikabakuraho imisoro, ikabakuraho n’ibindi ariko ayo kwiteganyiriza ntiyatange.
Ngo ntiba ihembye umukozi kuko ngo iba imuhembye igice. Yagize ati: “Ko ari wowe uhemba abakozi (MINECOFIN), mwafashe inshingano zanyu. Kuko umukizi ntabwo aba ahembwe ahubwo muba mumubeshye ko mumuhembye, ariko mu by’ukuri mutamuhembye kuko hari umusanzu we yagombaga gutanga mu kwiteganyiriza uba utatanzwa. Buriya bariya bakozi ntabwo bigeze bahembwa.”
Umunyamabanga Uhoraho muri Minisiteri y’Imari n’igenamigambi, Caleb Rwamuganza yavuze ko ikibazo kitari icy’ubu kuko ngo izi nzego zahabwaga ingengo y’imari yo guhemba abakozi bazo.
Yavuze ko habaye amakosa ya kera muri amwe yahoze ari Amashuri Makuru yahujwe agakora ikitwa (Kaminuza y’u Rwanda). Ariko ngo uyu munsi muri Kaminuza y’u Rwanda ubwayo icyo kibazo ntagihari.
Avuga ko bicaranye n’inzego zitandukanye bemeranwa uko bagiye kuyishyura iyo misanzu y’abo bakozi barenganyijwe ntibishyurwa imishahara yabo yose.
Yagize ati: “Twumvikanye ko babanza kwishyurira nibura abageze mu kiruhuko cy’izabukuru. Bakayishyura vuba yo bitarenze uyu mwaka. Noneho andi tukayishyura nibura mu myaka itatu.”
Depite Munyangeyo Thogene we yavuze ko izi nzego ziba zikwiye gukurikirana abakozi baba barakoze ayo makosa.

Callixte NDUWAYO
UM– USEKE.RW