Riderman arakomeza gukurikiranwa ari hanze

Riderman kuri uyu wa 31 Nyakanga yamaze amasaha agera kuri 11 mu maboko ya Polisi ku Kicukiro, ni nyuma y’impanuka bivugwa ko yari yateje ku muhanda ugana Remera ahitwa Rwandex. Yaraye arekuwe ku mugoroba wo kuri uwo munsi.

Umuvugizi wa Polisi, ishami rishinzwe umutekano wo mu muhanda, Superintendent (SP) Jean Marie Vianney Ndushabandi yabwiye Umuseke muri iki gitondo ko uyu muhanzi yarekuwe ngo akomeze akurikiranwe ari hanze.

Yagize ati “Nibyo yarekuwe, ariko yarekuwe kugirango ajye kudeclara (gusobanura) impanuka yeteje hanyuma akomeze akurikiranwe ari hanze.”

SP Ndushabandi avuga ko mu Rwanda umuntu uwo ariwe wese ukoze icyaha agomba kugihanirwa hakurikijwe amategeko.

Aha yatebyaga agira ati “uziko burya hari abantu bakomeye tuba tutazi!! kuva ejo nta kindi ndi kubazwa kitari amakuru ya Riderman!!!” 

Uyu muhanzi warekuwe kugeza ubu ntiturashobora kumubona, haba no ku murongo wa Telephone irafunze. Gusa akiri mu buroko umunyamakuru w’Umuseke yamugezeho asanga ameze neza, gusa yatonzwe no kwambara amapingu kuko yavugaga ko ari ubwa mbere.

Atebye nawe yagize ati “ Iyi niyo bring-bring (imirimbo y’agaciro bambara ubusanzwe mu ijosi) nari ntarambara.”

Joel RUTAGANDA
UM– USEKE.RW