RCA yasabye ko umusanzu w’Abamotari utangwa rimwe mu kwezi aho kuba buri munsi

Ikigo cy’Igihugu gishinzwe guteza imbere amakoperative (RCA) kiratangaza ko cyashyizeho amabwiriza mashya yo guhangana n’ibibazo bivugwa mu makoperative y’abakora umwuga wo gutwara abantu kuri moto. Muri aya mabwiriza harimo ko umusanzu w’abanyamuryango uzajya utangwa rimwe mu kwezi aho kuba buri munsi ndetse ukanyuzwa kuri konti aho guhabwa umuntu mu ntoki.

Amakoperative y’abakora umwuga wo gutwara abantu kuri moto bazwi nk’abamotari (motard) hakunze kuvugwamo ibibazo byo gucunga nabi imari y’abanyamuryango.

Umuyobozi w’ikigo cy’igihugu gishinzwe guteza imbere amakoperative, Munanura Apolo avuga ko ibi bibazo biri mu makoperative hafi ya yose y’abamotari.

Avuga ko iki kibazo kigiye guhagurukirwa. Ati “ Nk’ikigo gishizwe guteza imbere amakoperative tuba dushaka ko ibintu byose bikorerwa mu mucyo tukaba dushaka ko ibibazo byose bikemuka bikava mu nzira.”

Avuga ko amakoperative ajyaho kugira ngo abayibumbiyemo biteze imbere, akavuga ko ibi bitagerwaho mu gihe ubuyobozi bw’aya makoperative bukurura bwishyira aho gushyira imbere inyungu z’abanyamuryango.

Uyu muyobozi wa RAC avuga ko hashyizweho mabwiriza mashya agamije gushyiraho uburyo buhamye bwo gucunga neza umutungo w’abibumbiye muri koperative.

Muri aya mabwiriza mashya harimo uburyo bwo gutanga imisanzu, no gushyiraho uburyo bwo gucunga imikoreshereze y’amafaranga.

Ubusanzwe, abanyamuryango b’amakoperative y’Abamotari bakunze gutaka ibibazo byo kutamenya umusanzu nyawo bagomba gutanga ndetse n’abo ushyikirizwa n’icyo ukoreshwa.

RCA ivuga ko umusanzu utangwa n’abanyamuryango ba koperative wajya utangwa rimwe mu kwezi kandi ukaba ungana ku bamotari bose bakorera mu Rwanda.

Iki kigo kivuga ko ibi bizaca akajagari kagaragaraga mu itangwa ry’imisanzu kuko igihe cyo kuwutanga kizaba kizwi ndetse ukajya unyuzwa mu bigo by’imari mu gihe umumotari yatangaga umusanzu mu ntoki agahabwa inyemezabubwishyu.

Amafaranga y’ibihano yacibwaga  umumotari  wakoze amakosa azajya ahabwa koperative abarizwamo mu gihe ubusanzwe abamotari bavuga ko batamenyaga inkurikizi y’aya mafaranga.

Mu yandi mabwiriza yashyizweho na RCA ni uko umumotari azajya ahabwa inyemezabwishyu y’amafaranga yose yishyuye igaragaza icyo yishuriye ayo mafaranga.

Amakoperative kandi arasabwa kujya akora ingengo y’imari y’amafaranga yose koperative izakenera ku mwaka kugira ngo haveho urujijo rw’uburiganya busanzwe buvugwa mu mikoreshereze y’imari yayo.

Aya mabwiriza anagaruka ku buyobozi bw’amakoperative basanzwe bavugwaho kunyereza umutungo, asaba ko amafaranga yose yasohotse mu gasanduku ka koperative akwiye kujya agaragazwa mu nyandiko z’ibarurishamari.

Ngo hari abihaga insimburamubyizi none bakaniwe urubakwiye…

Apolo Munanura uyobora RCA avuga ko mu makoperative hagaragaramo ikibazo cy’abantu bihaga insimburamubyizi uko bishakiye cyane cyane abayobozi.

Avuga ko izi nsimburamubyizi zigiye kujya zigenwa n’inteko rusange nyuma yo gusuzuma ibyakozwe n’usaba insimburamubyizi hakarebwa niba bijyanye n’inyungu za koperative.

Umuyobozi w’urugaga rw’amakoperative mu Rwanda,  Katabarwa Augustin avuga ko aya mabwiriza agiye gukemura ibibazo by’abayobozi b’amakoperative bari baramunzwe no gushaka kwikubira iby’abanyamuryango.

Ati « Hagaragaye ibibazo by’abayobozi ba za koperative n’abakozi bazo bangije umutungo wa koperative  mu buryo bwo kubikumira twabanje guhugura abayobozi b’amakoperative n’abakozi babo, mu masezerano y’ubufatanye twagiranye na police twahuguye abasekirite kugira ngo bajye badufasha gucunga umukano w’abamotari bagaragarizwa ububasha bwa koperative mu guhana ibyaha.»

Mu Rwanda habarurwa amakoperative 8 010 arimo ay’abakora umwuga wo gutwara abantu kuri moto agera muri 243 agizwe n’abanyamuryango 19 590.

RCA ivuga ko muri aya makoperative agera mu bihumbi Umunani akorera mu Rwanda, asaga 800 yagiye ahomba bitewe n’imicungire mibi y’umutungo wayo.

Josiane UWANYIRIGIRA
UM– USEKE.RW