Rayon na APR ziracyageretse ku gikombe, zombi zimaze gutsinda

Kuri aya makipe ahora ahanganye kandi afite abafana benshi ubu buri imwe itegereje ko indi ikora ikosa ryo gutsindwa mbere y’uko zihura (tariki 03/05/2016). Ku mikino zari zifite uyu munsi ntayakoze ikosa. Mu mukino,  ukomeye uyu munsi Rayon Sports yari yahuye na Mukura kuri Stade Huye ibatsinda kimwe ku busa, ni nako APR FC yabigenje i Nyamata ihatsindira Bugesera FC kimwe ku busa.

Umukino wa Mukura na Rayon niwo wari witezwe cyane, Mukura VS iherutse gutsindwa na APR FC aha iwayo, buri wese yibazaga ko bitari bube ‘kabiri kabiri mu rugo rw’umugabo’ ariko niko byagenze yongeye gutsindwa.

Abafana benshi nabo bari biteze ko APR nayo ishobora gutsindirwa mu Bugesera nk’uko byagendekeye Police FC ubushize ijyayo, ariko APR FC yabyitwayemo neza ihavana intsinzi y’igitego kimwe cyatsinzwe na Patrick Sibomana.

Umukino wa Mukura na Rayon watangiye nyuma y’imvura nyinshi yari yiriwe igwa mu mujyi wa Butare, mu kavura gacye ugitangira, ku munota wa gatanu gusa Kwizera Pierrot wa Rayon yateye ishoti rikomeye hanze ari inyuma y’urubuga rw’amahira ariko izamu rya Mukura rikizwa n’umutambiko waryo.

Ku munota wa 20 umuzamu wa Rayon Ndayishimiye Jean Luc bita Bakame yakuyemo ‘Coup Franc’ ikomeye cyane yari itewe neza na Christopher Ndayishimiye.

Ku munota wa 39, ku burangare bwa ba myugariro ba Rayon, Ndayishimiye Christopher na Cyiza Hussein Mugabo ba Mukura, basigaranye n’umuzamu Bakame ariko Christopher atera ku ruhande gato cyane ahusha igitego cyari cyabazwe na benshi mu bafana ba Mukura bahise bagwa mu kantu.

Igice cya mbere cyarangiye ari ubusa ku busa, mu gice cya kabiri Rayon yagumanye umupira cyane ibifashijwemo n’abakinnyi bayo bo hagati nka Kwizera Pierro na Niyonzima Olivier, MVS yo ikomeza gukoresha za ‘counter attack’  ikabona amahirwe akomeye.

Mu gice cya kabiri Mukura yavunikishije umukinnyi Zagabe J.Claude asimburwa na Nshimiyimana Ibrahim ariko ntibyagira icyo bihindura cyane.

Ku munota wa 63 Manishimwe Djabel wa Rayon yakoreweho ikosa, benshi bakeka ko ari penalty ariko Habimana Abdoul wasifuye uyu mukino ntigayitanga.

Nyuma y’iminota ibiri gusa ku mupira wahinduwe na Manzi Thierry (uyu munsi wakinnye iburyo mu kugarira kandi asanzwe akina hagati mu bugarira kuko Radjou yavunitse) wasanze Davis Kasirye atsinda igitego cy’intsinzi kiba icya cyenda muri iyi shampiyona.

Iki gitego cyateje imvururu mu kibuga kuko benshi bemezaga ko uyu rutahizamu ukomoka muri Uganda yari yaraririye ariko abasifuzi batabibonye uko, izo mvururu zatumye Mazimpaka Andre na Habimana Yousuf babona amakarita y’umuhondo.

Imikino y’uyu munsi wa 18 uko yagenze:

Mukura 0-1 Rayon Sports
Kiyovu Sports 3-0 Musanze
Bugesera 0-1 APR FC
Police 0-0 Rwamagana
As Muhanga 0 – 2 Marines
Etincele 2-1 Sunrise
Bugesera  0 – 1 APR FC
Kiyovu 3 – 1 Musanze FC

Amakipe akurikiranye mu mikino yakinnye n’amanota afite:

1  APR FC 19              43
2 Rayon      18            39
3  Kiyovu     19           35
4 Mukura   19            35
5 Police FC 19            32
6  AS Kigali  18          31
7 Gicumbi     18         24
8 Sunrise Fc 19          24
9 Bugesera  19            24
10 Marines  19           21
11 Espoir 19                20
12 Amagaju 19           20
13  Musanze 19          16
14 Etincelles 18         16
15 Rwamagana 19      11
16 Muhanga   19        11

Roben NGABO
UM– USEKE.RW