Ngororero: Kampani icukura amabuye y’agaciro yahaye abaturage inka 20

Kuri uyu wa gatatu taliki ya 06/Mata/2016 Kampani  ishinzwe ubucukuzi bw’amabuye y’agaciro mu karere ka Ngororero (Ngororero Mining Company) yahaye inka abaturage  20 batishoboye  mu rwego rwo guteza imbere imibereyeho yabo.

Iki gikorwa cyo guha abaturage batishoboye inka cyabereye mu murenge wa Gatumba  kigamije kuzamura  imibereho y’abaturage  bafite ubushobozi buke.

Jean Ruzindana uyobora kampani avuga ko batekereje kuremera aba baturage bashingiye ku rugero rw’uko hari za kampani zababanjirije zitigeze zita  ku baturage kandi ibikorwa byazo byarinjizaga imari igaragara.

Ruzindsana avuga ko  kugira ngo abaturage barusheho kugirira icyizere  iyi sosiyete y’ubucukuzi ahagarariye ari uko bakomeza kugira uruhare mu kuzahura imibereho yabo binyuze mu kubaha inka.

Yavuze ko babikoze bagamije kugera ikirenge mu cy’Umukuru w’igihugu Paul Kagame watangije gahunda ya Girinka.

Yagize ati: “Uretse  guha aba baturage  batishoboye inka, hari n’ibindi twifuza gukosora  bagenzi bacu batubanjirije batigeze bitaho muri byo harimo kubaka amshuri n’amavuriro.”

Léocadia Nyanzira w’imyaka 80 y’amavuko, avuga ko  aheruka kunywa amata  mu myaka icumi n’umunani  ishize uwari umugabo we akiriho, kuba ngo agiye kongera korora bizamufasha kubona ifumbire  kandi agasaza anywa amata.

Ati: “Nta fumbire nabonaga kandi kunywa amata bigiye kuzampa ingufu  zo guhinga imirima yanjye  mu myaka mike nsigaje kubaho.”

Uwihoreye Patrick umunyamabanga nshingwabikorwa w’Umurenge wa Gatumba, avuga ko  guhitamo aba baturage bakennye  kurusha abandi byakozwe na komite  z’imidugudu batuyemo.

Ngo byakozwe mu rwego rwo kwirinda ibibazo bikunze kuvuka  kuri bamwe mu bayobozi b’inzego z’ibanze  aho mbere bakaga ruswa abaturage bagiye kubashyira ku rutonde rw’abagomba guhabwa inka.

Uyu muyobozi avuga ko aya makosa atazongera kubaho kuko umubare w’abantu babahitamo ugizwe n’abantu b’inyangamugayo  ndetse ngo batari  abayobozi.

Izi  nka  20  zatanzwe zifite agaciro ka  miliyoni icyenda z’amafaranga y’u Rwanda, aborojwe bavuga ko bazazifata neza kugira ngo bazoroze bagenzi babo bafite amikoro make. Akarere kakaba kemereye aba baturage kubaha imiti mu gihe cy’amezi  atandatu.

MUHIZI ELISEE
UM– USEKE. Rw/Ngororero.