Ngoma: Incike ya Jenoside arashinja Islam kumunyaga ubutaka amazemo imyaka 20

*Baramusaba kujya kubaka aho yarokokeye,
*Hari abakeka ko ari uko atakiri umuyoboke w’iri dini,…

Mu kagari ka Sakara, mu murenge wa  wa Murama, akarere ka Ngoma, Mukankurunziza Afisa wasigaye ari incike nyuma ya Jenoside yakorewe Abatutsi aravuga ko abo mu idindi ya Islam bari kumubuza gusana inzu ye yubatse mu butaka yahawe n’iri dini mu 1997, ubu bakaba bari kumusaba kujya kubaka aho yarokokeye.

Uyu mubyeyi uri gukumirwa mu butaka amazemo imyaka 20 aherutse guhabwa amabati n’Ikigega gifasha abatishoboye bacitse ku icumu rya Jenoside (FARG) kugira ngo asane inzu ye yangiritse.

Avuga ko yatunguwe no gukomwa mu mutungo yitaga uwe kuva mu 1997 ubwo idini ya Islam yamuhaga ubutaka bwubatsemo iyi nzu yari yiyubakiye.

Ati “ Ubu arabitse (amabati) bambujije kubaka barambwira ngo nta bwumvikane tugifitanye ngo ningende nge kubaka aho nacikiye ku icumu, nkababwira nti ese ndasubira mu matongo nsangayo nde?”

Mukankurunziza wasabwe n’abayobozi b’idini ya Islam muri aka gace kuva mu butaka bari baramuhaye avuga ko atasubira mu murenge wa Mutenderi (aho yarokokeye) kuko ntacyo asangayo.

Uyu mubyeyi wari ufite n’ibindi bikorwa muri ubu butaka agira ati ” Ndifuza ko bampa uburenganzira nkubaka, ariko gusubira mu matongo byo sinsubirayo.”

Umuseke wagerageje kuvugisha umuyobozi w’idini ya Islam mu kagari ka Sakara, Mutatsineza Radjabu avuga ko atifuza kuvugisha Itangazamakuru. Ati “ Mugende muvuge  ko nanze kubavugisha.”

Abaturanyi ba Mukankurunziza bamaranye imyaka 20 basabana umunyu bavuga ko bidakwiye ko umuntu yamburwa ubutaka amazemo igihe kingana gutya ngo asabwe kujya kubaka aho yarokokeye.

Umuyobozi w’umurenge wa Murama, Buhiga Josuse  avuga ko iki cyemezo cy’idini cyabatunguye gusa akavuga ko babahaye icyumweru kimwe kugira ngo rigitekerezeho bihagije.

Ati ” Nbabwiye ko bagenda bakabitekerezaho neza ariko ko badashobora gusenyera uriya mubyeyi ngo age kubaka ahandi kandi baramugiriye impuhwe muri 97 kandi nta n’ukuntu bari kumwemerera ngo atere ikawa batarahamuhaye, ndibwira ko mu cyumweru gitaha ikibazo kizakemuka neza.”

Afisa avuga ko iri dini rya ryamugiriye impuhwe rikamugabira ubutaka ryaje kumuca ruhinganyuma rikajya kubaruza ubu butaka.

Hari abavuga ko kuba Afisa yaraje kuva mu idini ya Islam bishobora kuba ari yo ntandaro yo kuba bashaka kumunyaga.

Elia BYUK– USENGE
UM– USEKE.RW/ NGOMA