Muhanga: Imiryango 2 y’abasigajwe n’amateka ngo izubakirwa ariko ibanje guhanwa

*Imiryango 2 y’abasigajwe inyuma n’amateka imaze imyaka irenga 2 idafite amacumbi
*Umwaka ushize ubuyobozi bw’umurenge bwabwiye Umuseke ko bugiye kuyubakira
*Kuri ubu Gitifu avuga ko bagiye kubakirwa babanje guhabwa ibihano mu nteko y’abaturage

Nyuma y’aho Umuseke ukoreye inkuru ku baturage basigajwe inyuma n’amateka batuye mu mudugudu wa Kuwimana, akagali ka Biringaga, umurenge wa Cyeza mu Karere ka Muhanga wasanze  umwe muri iyo miryango umaze igihe kirenga umwaka urara hanze ku gasozi, ubuyobozi bw’umurenge buravuga ko buzubakira aba banyarwanda ariko bubanje kubahana.

Icyo gihe Ubuyobozi bw’umurenge wa Cyeza bwavugaga ko bugiye  kuwushakira icumbi byihuse, kuko byari byatumye habaho gutatana kw’abagize uwo muryango kubera ibibazo by’ubuzima bubakomereye.

Umuseke wongeye gusura iyi miryango usanga nta kirakorwa kuko bakiri mu biti bikikijwe n’imifuka ndetse n’ibitambaro bishaje.

Murwanashyaka Nsengiyumva avuga ko umugore amaze kurambirwa no kudahabwa ubufasha cyane cyane ubw’icyumba yahisemo kwigendera n’abana umunani akaba ariwe usigaye muri ako kantu ashyiramo umusaya amaguru agasigara hanze.

Yagize ati:«Kuva mwadusura nta muyobozi n’umwe ku rwego rw’Akagari cyangwa urw’Umurenge barangeraho kandi aha niho banyura bajya mu kazi»

Umunyamabanga Nshingwabikorwa w’umurenge wa Cyeza, Valérie Mukantwali,  avuga ko kuba batarubakiye iyi miryango byatewe n’uko hari amakuru bamenye avuga ko bisenyeye, akaba avuga y’uko n’ubwo bazahabwa ubufasha bw’inyubako hari ibihano bibateganyirijwe mbere.

Ati:«Tuzabanza tubahanire imbere y’inteko y’abaturage bose kuko abo baturage aribo bari baragize uruhare mu kubaka ba nyirubwite bisenyeye»

Mu makuru Umuseke wamenye ni uko umuryango wa Murwanashyaka wigeze kugira inzu yubakishije ibiti nk’uko byemezwa n’abaturage, gusa bakavuga ko atari we wisenyeye ahubwo ko byakozwe n’ibiza by’imvura.

Umuyobozi w’umudugudu wa Kuwimana ni we wenyine wavuze rumwe n’ibyo Umuyobozi w’umurenge avuga ko yisenyeye.

Umuryango wa kabiri na wo umurenge uvuga ko uzaha ubufasha wo ufite ikibazo cyo kuba mu kazu  gato k’icyumba kimwe n’uruganiriro barazamo inka bahawe muri gahunda ya Girinka.

MUHIZI ELISEE
UM– USEKE.RW/Muhanga