Muhanga: FARG n’Akarere bagiye kuzuza amazu 7, imwe ifite agaciro ka Miliyoni 39

Ku bufatanye bw’ikigega gishinzwe kwita no gutera inkunga abarokotse Jenoside (FARG) n’akarere, mu mudugudu wa Munyinya, mu kagali ka Ruli, mu murenge wa Shyogwe ho mu Karere ka Muhanga,  hagiye kuhuzura amazu agezweho, imwe izaba ifite agaciro ka Miliyoni 39 Frw, yitezweho gukemura ikibazo cy’amacumbi, imwe izaba ifite ubushobozi bwo kubamo imiryaango ine.

Izi nzu zubatswe n’Akarere ka Muhanga ku bufatanye n’ikigega gishinzwe gutera inkunga  abarokotse Jenoside (FARG), ziteweho kuba intangarugero ku bashoramari mu kubyaza umusaruro ubutaka buto ko bushobora guturwaho n’abantu benshi.

Umuyobozi ushinzwe ibikorwaremezo mu Karere ka Muhanga, Nzabonimpa Onesphore avuga ko akarere  kashyize  mu mihigo yako kubaka aya mazu  kugira ngo bareshye abashoramari benshi gushora imari yabo muri iki gikorwa akavuga ko ari itangiriro ko bigomba gukomereza no mu yindi mirenge.

Nzabonimpa avuga kandi ko  aya mazu 7 yubatse ku buso bwa hegitari 4.9 ndetse ko amafaranga y’ingurane y’ebyeri n’igice muri zo yamaze gutangwa, asigaye akazatangwa mu minsi ya vuba hakurikije ubushobozi Akarere kagenda kabona.

Yagize ati «Ubutaka izi nzu zubatseho ni buto cyane ugereranyije n’uko zingana»

Uyu muyobozi  yongeyeho ko hari gutegurwa indi gahunda yo kubaka inzu imwe nini izaba ifite ubushobozi bwo gucumbikamo imiryango umunani.

Mamiriho Samuel utuye mu murenge wa Shyogwe, avuga ko mu kubaka ibikorwa remezo bifitiye akamaro abaturage, ubuyobozi bukwiye kwita ku kibazo cy’ingurane  z’imitungo y’abaturage, kuko ngo usanga hari igihe babimuye batitaye ku bikorwa bari bahafite.

Guverineri w’Intara y’Amajyepfo,Munyantwari Alphonse, wari waje mu gikorwa cy’umuganda no gusura aya mazu, yavuze ko  ubuyobozi bwa none bwifuriza Abanyarwanda ibyiza, ari na yo mpamvu ibyo byiza iyo bibonetse bigomba  kugera ku baturage.

Munyantwari avuga ko kugera kuri ibi bikorwa byose bisaba ubufatanye, by’umwihariko mu kubungabunga umutekano n’izindi gahunda zitandukanye ziteza imbere abaturage.

Inzu imwe ifite agaciro ka Miliyoni 39 z’amafaranga y’u Rwanda, Akarere ka Muhanga kakaba kamaze kwishyura asaga miliyoni esheshatu y’ubuso bwa hegitari izi nzu zubatseho.

Muri uyu mudugudu wa Munyinya, hakaba hari agace kagenewe guturwamo, ak’ubucuruzi, ndetse n’akagenewe  ibindi bikorwaremezo birimo amashuri, n’amavuriro.

MUHIZI ELISEE
UM– USEKE.RW/Muhanga