Muhanga: CAF Isonga ifite umweenda wa miliyoni 100 Frw igiye kongera gukora

Mu nama yahuje ubuyobozi bw’Intara y’Amajyepfo, BNR, CAF Isonga n’abanyamigabane bayo bashya, kuri uyu wa Kane, umuyobozi w’Intara y’Amagepfo, Munyantwari Alphonse yatangaje ko iki kigo cyari kimaze amezi atatu kidakora kubera umweenda wa miliyoni 100 kiri kwishyuzwa na bamwe mu bahoze ari abanyamigabane bacyo kigiye kongera gufungura imiryango.

CAF Isonga ivuga ko iri kwishyuza inguzanyo ya miliyoni 400 zahawe abakiliya bayo, igiye gukorana na MOBI CASH nk’umushoramari mushya.

Iki kigo cyo kubitsa no kuguriza cyafunze imiryango nyuma y’aho umuhesha w’inkiko afatiriye imitungo yacyo kubera ibirarane by’imigabane cyari kibereyemo bamwe mu banyamigabane bacyo.

Muri iyi nama yabereye mu karere ka Muhanga, ubuyobozi bw’Intara y’amagepfo na tumwe mu turere twayo, hemeranyijwe ko iki kigo cyongera gukorera Abanyarwanda nk’uko ari yo ntego yatumye kivuka.

Guverineri w’Intara y’Amagepfo, Munyantwari Alphonse, avuga ko  gusaba ko CAF yongera gukora ari byo biri mu bushobozi bw’ubuyobozi.

Munyantwari ugaruka ku manza iki kigo gifite mu nkiko, avuga ko ubuyobozi bw’intara n’akarere budafite ubushobozi bwo guhagarika izi manza kuko ubucamanza bwigenga,

Uyu muyobozi w’Intara y’Amagepfo avuga ko abanyamigabane batsindiye amafaranga bagomba kwishyurwa n’iki kigo batagomba gutambamira imikorere y’iki kigo kuko imikorere yacyo ari yo izavamo bwishyu bwabo.

Ati « Ibibazo biri mu nkiko bikomeze ariko ikigo cyongera gikora neza, ndumva nabo (abo kibereyemo umwenda) bizabashimisha»

Umuyobozi Mukuru wa CAF Isonga, Kalisa Kayiranga Callixte, avuga ko  impamvu nyamukuru yatumye iki kigo gifungwa ari imyumvire ya bamwe mu banyamigabane bagombaga kwishyurwa batekerezaga ko mu gihe cyakoraga cyariho cyunguka kandi hari amafaranga menshi ataragarujwe.

Kalisa avuga ko ubuyobozi bwa CAF Isonga bugiye kugirana ibiganiro n’abanyamuryango, bakabasobanurira ko hari umushoramari mushya ugiye gufatanya n’iki kigo kandi ko bitanga icyizere ko amafaranga yabo aziyongera

Umuyobozi  ushinzwe ibigo by’Imali iciriritse muri Banki Nkuru y’Igihugu (BNR), Kavugizo Shyamba Kévin avuga ko hari ibyangombwa bigomba kubanziriza imikorere ya CAF, birimo gukorerwa igenzura.

Uyu muyobozi uvuga kandi ko ubuyobozi bw’iki kigo bugomba kubanza bugahumuriza abakiliya babitsa muri iki kigo, avuga ko bikwiye ko Abaturarwanda bagomba kukigarurira icyizere.

MUHIZI ELISEE
UM– USEKE.RW/Muhanga