Muhanga: Ba ‘DASSO’ 3 batawe muri yombi bakekwaho kwiba ibikoresho by’akarere

Abagabo batatu bakorera urwego rwa DASSO (bakunze kwitirwa uru rwego) basanzwe bacunga umutekano wo ku biro by’akarere ka Muhanga bari mu maboko ya Polisi bashinjwa kwiba mudasobwa z’ubuyobozi bw’akarere ka Muhanga. Police ivuga ko aba bose biyemereye icyaha.

Abakozi b’akarere ka Muhanga bamaze iminsi itatu babuze ibi bikoresho, basabye inzego z’umutekano zirimo n’urwego rwa DASSO rukora ku biro by’aka Karere gukora iperereza kuri ibi bikoresho byibwe.

Nshimiyimana Sylvèstre w’imyaka 32 na mugenzi we Nsabimana Olivier bombi bakora muri DASSO (babita ba DASSO) bavuga ko Kuri iki cyumweru taliki ya 30 Mata bakinguye ibiro by’umunyamabanga Nshingwabikorwa w’akarere bibamo mudasobwa ebyiri.

Bamwe mu bakozi b’akarere ka Muhanga  babwiye  Umuseke ko inzego z’Umutekano zagiye gusaka aho aba bakozi b’urwego rwa DASSO bacumbitse basanga izo mashini uko ari ebyiri zihari, kandi ko  aba bazisanganye biyemerera ko bakoze iki cyaha cy’ubujura buciye icyuho.

Aba bagabo babiri bakunze kwita ba DASSO (kubera urwego bakorera) bashinja mugenzi wabo witwa Musabyimana Fabrice ko hari indi mashini  y’umuyobozi w’ishami ry’ubutegetsi n’imari mu Karere ka Muhanga aherutse kwiba.

Station ya Police ya Nyamabuye yemera ko  aba bakozi bose uko ari batatu ibacumbikiye gusa ikavuga ko itagira byinshi itangaza kuri aya makuru kuko bakiri gukora iperereza.

Police ivuga ko uyu Fabrice ushinjwa na bagenzi be aherutse kwiba n’ibikoresho by’imodoka y’akarere (DAIHATSU) ariko ko yafatanyije n’abandi bagishakishwa.

Umuseke ukora iyi nkuru wahamagaye Umuvugizi wa Police mu Ntara y’Amajyepfo ariko ntiyabasha kwitaba telefone ye ngendanwa.

Mu mwaka ushize kandi hari bamwe mu bakozi ba DASSO  barindaga ibiro by’Akarere ka Muhanga bacukuye biba amwe mu madosiye 28 arebana na gahunda ya VUP (Vision Umurenge Program) yo mu Murenge wa Nyabinoni nyuma baza gufatwa batabwa muri yombi.

Icyo gihe kandi  hari abavugaga ko abashinjwaga kunyereza amafaranga ya VUP muri uyu murenge wa Nyabinoni aribo bari bihishe inyuma y’ubu bujura bw’amadosiye ya VUP.

Abakozi b’Akarere bavuga ko batiyumvisha aho aba bakozi ba DASSO bakura imfunguzo zo gukingura ibiro bya buri mukozi, kuko hari n’izindi mashini nyinshi zagiye zibwa mu bihe bitandukanye ariko ntizifatwe.

MUHIZI ELISEE
UM– USEKE.RW/Muhanga