Muhanga: ADEPR yanze kumuzamura mu ntera kuko akekwaho ubusambanyi

Emmanuel Mulisa ni umuyobozi w’ikigo Itorero ADEPR rikoreramo amahugurwa (CEFOCA) akaba anayobora ikigo cy’amashuri y’imyuga n’ubumenyingiro (Christian Integrated Polytechnic) byose biherereye ku mu Murenge wa Nyamabuye, mu Karere ka Muhanga. Abayobozi muri ADEPR banze kumusengera ngo azamurwe mu ntera kuko avugwaho ubusambanyi.

Ku itariki 09 Mutarama 2016, Mulisa na bagenzi be bane bagombaga guhabwa inshingano zo kuba abakuru b’itorero, ariko ngo kuko Mulisa akekwaho ubusambanyi yaje gukurwa ku rutonde iminsi itatu mbere y’uko basengerwa.

Bamwe mu Bakristo, ababyeyi n’abayobozi bo muri iri torero bavuganye n’Umunyamakuru w’Umuseke bavuze ko kuva uyu Mulisa yatangira imirimo ye muri ADEPR Paruwasi ya Nyabisindu, yagiye avugwaho ingeso zo gusambanya abana b’ababkobwa, hagira ubimubaza akavuga ko nta muntu agomba ibisobanuro.

Abakristo bavuga ko byageze aho umwe mu bakobwa wakoreraga stage (kwimenyereza umwuga) yo kurangiza umwaka wa gatandatu w’amashuri yisumbuye mu kigo ayobora, ngo Mulisa yamusabye ko baryamana ariko ngo umukobwa arabyanga anabibwira nyina ko Mulisa ari kumutesha umutwe amusaba ko baryamana.

Umubyeyi w’uyu mwana w’umukobwa twaganiriye ariko utashatse ko amazina ye atangazwa, avuga ko umwana we yamubwiye inshuro nyinshi ko ashobora kubura amanota bitewe n’uko yanze kuryamana na Mulisa.

Nyina amusabye gushaka ibimenyetso bigaragaza ko ibyo avuga ari byo, uwo mwana w’umukobwa yigiriye inama yo gufata amajwi Mulisa akoresheje telefone ye igendanwa, ikiganiro yise ko ari kibi bagiranye na Mulisa agishyira kuri CD maze ayumvisha umubyeyi we.

Umuseke ufite aya majwi bivugwa ko ari aya Mulisa asaba uriya mwana w’umukobwa ko baryamana.

Umubyeyi ati “Kuva aho umwana atangiye kubimbwirira nagize impungenge nyinshi mbibwira Abapasiteri bakora iperereza ryimbitse, ntumbaze icyo ryagezeho naje kumva bambwiye ko bamuvanye ku rutonde gusa ntibihagije niba afite iyo ngeso.”

Emmanuel Mulisa ushinjwa ibi byaha, yemera ko gukekwaho icyaha cy’ubusambanyi ari byo byatumye avanwa ku rutonde rwa bagenzi be, ariko ko byatewe n’abantu bamugirira ishyari kuko ngo n’uwo mukobwa bamushinja atamuzi, kandi ko abacuze uyu mugambi ari abasanzwe barwanya ubuyobozi n’inzego nkuru z’itorero ADEPR batifuza ko yatera imbere.

Mulisa akavuga ko yaje gukorera muri Paruwasi ya Nyabisindu mu gihe itorero ryarimo umwuka mubi, n’amakimbirane ya hato na hato.

Akavuga ko akunze gufasha impfubyi n’abapfakazi bo muri iri torero, ku buryo atatinyuka gukora icyaha cy’ubusambanyi kandi ngo imirimo myiza ariyo bamuziza.

Yagize ati “Iyo CD bavuga ko ari ijwi ryanjye irimo ijwi ry’abagabo babiri (baganira), none se uwo banshinja ni umukobwa waba ufite ijwi ringana gutyo.”

Pasiteri Jean Damscène Mudenge wayoboraga Paruwasi ya Nyabisindu mu kwezi gushize ubu akaba yarimuriwe mu Karere ka Kamonyi, avuga ko mu bantu batanu itorero ryari ryatanze yaje kubwirwa n’inzego zimukuriye mu itorero ko Mulisa agomba kuvanwa ku rutonde kubera ko ngo hari amakuru y’icyaha cy’ubusambanyi bamukekaho, bityo ko badashobora kwirengagiza aya makuru ngo bamuhe inshingano zo kuyobora abakristo.

Ati “Twagiye twakira amakuru kenshi ko Mulisa akekwaho iki cyaha, jye namusabye ko yazana urugo rwe i Muhanga aho akorera arabyanga, kandi nagiraga ngo aya makuru adakomeza kumuvugwaho.”

Kugeza ubu benshi mu babyeyi barerera ku ishuri “Christian Integrated Polytechnic” baribaza uko umuntu itorero ryanze gusengera kubera ibyaha akomeza kuyobora ibigo itorero rifite mu nshingano.

Umuyobozi mu Karere ka Muhanga ushinzwe uburezi Claude Sebashi avuga ko nabo bari gukora iperereza kugira ngo bamenye neza niba ibyo Mulisa ashinjwa bifite ishingiro, ubundi bafate icyemezo hakurikijwe amategeko.

MUHIZI ELISEE
UM– USEKE.RW/Muhanga