Mugesera yavuze ko atari Interahamwe, atanashinze umutwe wazo

“Ntabwo interahamwe zashinzwe ari ‘Anti Tutsi’ (kurwanya Abatutsi)”;

“Mu bari baziyoboye hari harimo n’Abatutsi”;

“ Ntabwo jye Mugesera ndi Interahamwe; sinigeze mba Interahamwe; sinashinze Interahamwe;”

09/06/2014- Mugesera ukurikiranyweho n’Ubushinjacyaha bw’u Rwanda ibyaha birimo ibya Jenoside n’ibyibasiye inyokomuntu, yabwiye Urukiko ko ibyatangajwe n’umutangabuhamya Ngerageze Muhamud ntaho bihuriye n’ukuri kuko yitangarije ko atari amuzi.

Mugesera yanengaga ubuhamya bwatanzwe mu rukiko n’uwitwa Ngerageze Muhamud muri 2013, aho yasobanuriraga inteko y’Urugereko rwihariye rw’Urukiko rukuru ruburanisha ibyaha mpuzamahanga n’ibyambukiranya imbibi ko uyu mutangabuhamya yaranzwe n’amahane aremereye yise “Agressivite”.

Yagize ati “…yari afite amahane, yuka Mugesera inabi, aya mahane akagaragaza ko yabogamye.”

Agaragaza aho uyu mutangabuhamya yamwutse inabi, Mugesera yongeye gusubira mu bibazo yagiye amubaza n’ibisubizo yamusubizaga aho bimwe na bimwe yongeraga kubisomera urukiko.

Asa nk’usubira mu ijwi ry’umutangabuhamya, ku gisubizo yamuhaye amubajijwe ubwoko bwe n’ibindi bibazo bishamikiyeho, Mugesera yagize ati “ Aho kumbwira ubwoko bwe nk’uko nari mbimubajije, yansubizanyaga uburakari ngo ishusho wari urimo si yo ya none, ngo ndi Umunyarwanda.” 

Akomeza kugaragaza uburakari bw’uyu mutangabuhamya, Mugesera yavuze ko yongeye kumubaza niba yemera amoko atatu aba mu Rwanda ngo akamusubiza agira ati “ Ndi Umunyarwanda yewe, sinongera kubisubiramo.”

Uregwa yakomeje avuga ko uku kukwa inabi byagaragaje ko uyu mutangabuhamya abogama ndetse ko ibyo yatangaje bidakwiye kwizererwa ko ahubwo yari yazinduwe no kumucira urubanza.

Yagarutse ku kindi kibazo yabajije uyu mutangabuhamya, kijyanye n’abajyanaga abantu ku gahato muri “meeting” yo ku Kabaya nk’uko yari yabitangaje mu buhamya bwe, akamusubiza ko bajyanwaga n’Interahamwe bagenzi ba Mugesera.

Mugesera yahise avuga ko ibi byatangajwe n’Umutangabuhamya byuzuye kubogama, agira ati “ c’est tres grave (birakomeye cyane) c’est la partialite pure (ni ukubogama kwa nyako), aragagaza ko yari yaje kuncira urubaza.”

Mugesera, yakomeje avuga ko uko kubogama kwatumye amubeshyera, ati “ ntabwo jye Mugesera ndi Interahamwe, sinigese mba Interahamwe, sinashinze Interahamwe.”

Yahise aboneraho umwanya wo kugaragaza ishusho y’Intehamwe, avuga ko zashinzwe hagamijwe kubohoza igihugu cyari cyatewe n’uwafatwaga nk’umwanzi icyo gihe ndetse ko zitari zigizwe n’Abahutu gusa ahita atanga urugero ko no mu bari baziyoboye hari harimo uwitwa Kajuga wari Umututsi.

Yavuze ko yatunguwe no kuba uyu Mutangabuhamya yaragagaje ko muri icyo gihe Interahamwe zakoze ibikorwa byinshi bibi kandi mu buhamya bwe hari aho yari yatangaje ko atigeze yitabira inama z’Interahamwe.

Mugesera ntazwi!!

Uregwa (Mugesera) yavuze ko uyu mutangabuhamya yatangarije Urukiko ko atari azi Mugesera ko yamumenye muri “Meeting” yo ku Kabaya kandi mu kirego cy’Ubushinjacyaha bwaragaragaje ko Mugesera yari umuntu ukomeye bityo ibibi byose bimuvugwaho ubu ari ukubimwitirira.

Ati “Mu kirego cy’Ubushinjacyaha, bavuga ko Mugesera ari Umuntu wari ukomeye, bakamushyira ku gasongero… mbese ko yari icyamamare, none buzanye umutangabuhamya utazi iki cyamamare, bigaragaza ko ibyo bamuvugaho byose ari ukubimwitirira, ni ‘mythe’ (umugani).”

Yakomeje avuga ko Mugesera wazanywe mu rukiko atari uwa nyawe, ati “Uwo bavuga aha ni Faux Mugesera; ni Mugesera w’umuhimbano kugira ngo yangwe, hajishwe Mugesera nyawe.”

Mugesera yavuze ko Ngerageze Muhamud yaranzwe no kwivuguruza ndetse akanatangaza ibyavuzwe na Mugesera muri “Meeting” yo ku Kabaya nyamara bitari mu kirego Ubushinjacyaha bwashyikirije Urukiko.

Iburanisha ry’uru rubanza ryimuriwe ku wa kane tariki ya 11 Kamena 2015

Martin NIYONKURU
UM– USEKE.RW