Mu gitaramo cya Auddy Kelly abagore bari bambaye umweru, abagabo umukara

Audace Munyangango uzwi ku izina rya Auddy Kelly yaraye akoreye igitaramo cyo kwizihiza isabukuru y’imyaka ine ishize hashinzwe umuryango El-Familia ugizwe n’abakunda uyu muhanzi. Abakobwa/abagore bitabiriye iki gitaramo baje bambaye imyenda y’ibara ry’umweru mu gihe abasore/abagabo bari bambaye umukara.

Abateguye iki gitaramo bari basabye abazakitabira ko baza bambaye iyi myambaro, nabo barabyubahiriza. Ibintu byari binogeye amaso.

Iki gitaramo ariko cyatangiye bitinze dore ko umuhanzi wa mbere yageze ku rubyiniro ahagana saa Mbili z’ijoro mu gihe byari biteeganyijwe ko gitangira saa 18h00 z’umugoroba.

Ni ibirori byitabiriwe n’abakunzi b’uyu muhanzi binjiraga babanje gutanga inkunga y’ibihumbi bibiri azashyirwa mu gasanduku k’uyu muryango warahiriye kugwa inyuma uyu muhanzi.

Iki gitaramo cyaranzwe no guhuza urugwiro hagati y’inshuti z’uyu muhanzi, kitabiriwe n’abahanzi batandukanye barimo Itsinda rya TBB, Jules Sentore, Peace Jolis, Gabiro, Yvan Buravan na Serge Iyamuremye uririmba indirimo zihimbaza Imana.

Aba bahanzi bari baje kwifatanya na Auddy Kelly n’abakunzi be, bagiye baririmba uduce twa zimwe mu ndirimbo zabo zagiye zikundwa, bakagenda bikirizwa n’aba bafana ba Auddy byumvikanaga ko basanzwe bakurikirana umuziki Nyarwanda.

Iki gitaramo cyagaragayemo abakuze, barimo abo mu muryango w’uyu muhanzi ndetse n’umubyeyi we yari yaje kwifatanya n’abakunda umuhungu we.

Auddy Kelly wahumuje iki gitaramo, yageze ku rubyiniro, imbaga y’abakunzi be ihagurukira rimwe bamufasha kuririmba indirimo ze zagiye zimenyekana nka Sinzagutererana.

Iki gitraramo cyarangiye ahagana sa 22h00 z’ijoro, cyanagaragayemo abamurika imideli yateguwe n’abanyamideli Tity na Olivier.

Photos © I. ISHIMWE

Innocent ISHIMWE
UM– USEKE.RW