MIFOTRA irakora iki ngo itangwa ry’akazi rinyure bose?

Minisitiri w’Abakozi ba Leta n’Umurimo, Anastase Murekezi uyu munsi yari imbere ya Komisiyo y’imibereho myiza y’abaturage, uburenganzira bwa muntu n’ibibazo by’abaturage muri Sena, aho yasobanuye ko Leta yashyizeho ingamba nyinshi zo kunoza itangwa ry’akazi no gucunga abakozi bayo. Ni nyuma y’ibyagaragajwe bikemanga imitangirwe y’akazi n’imikorere y’abakozi ba Leta.

Iyi komisiyo yatumiye Minisitiri w’Abakozi ba Leta n’Umurimo mu rwego rwo kungurana ibitegezo na we kuri raporo yakozwe mu mwaka w’umurimo 2012-13 yerekanye ko hakiri ibibazo binyuranye mu mitangirwe y’akazi no mu gucunga abakozi ba Leta.

Iyo raporo igaragaza ko abantu bagera kuri 67% aribo babona ko gutanga akazi mu Rwanda binyura mu mucyo abandi basigaye bakaba badafitiye icyizere inzego zitanga akazi mu Rwanda.

Muri iyo raporo kandi byagaragaye ko hari abakozi bajya mu myanya batapiganiye, abakozi bahabwa akazi batujuje ibisabwa, ibigo bikora bidafite imbonerahamwe igaragaza uko bikora, ibidatanga amanota ku bakozi kandi ariyo ashingirwaho kugira ngo umukozi azamurwe mu ntera.

Hari ngo n’abakoresha batinda gutanga ibisabwa ngo abakozi babo babone umushahara bigatera ikibazo cy’ibirarane ndetse ngo hari n’abatinda kwishyurira abakozi babo ubwishingizi mu kwivuza.

Ibi bibazo ariko cyane icy’uko hakiri umubare munini w’abaturage badafitiye ikizere inzego zitanga imirimo, nibyo Ministre w’abakozi ba Leta yaganiriyeho n’akanama k’abasenateri kuri uyu wa mbere.

Abakosora ikizami cyanditse sibo bazajya bakoresha ‘interview’

Nk’uko Ministre w’Abakozi ba Leta yabisobanuye, bi ngo ni ugukemura ikibazo cyagaragaye cy’uko hari abantu bagira amanota make mu kizamini cy’akazi cyanditse ariko ugasanga mu kizamini cyo kuvuga (Oral Interview) bahawe amanota menshi cyane agahita abazamura.

Ibyo rero ngo bizakemurwa no gushyiraho abakosora ikizamini cyanditse batandukanye n’abakosoye ikizamini cyo kuvuga, akanama kakosoye ikizamini cyanditse kakazajya gatangaza amanota nyuma abandi na bo batangaze ay’ikizamini cyo kuvuga nyuma noneho hakorwe impuzandengo y’ayo manota.

Minisitiri yabwiye Abasenateri bo muri Komisiyo y’imibereho myiza ko hari hatekerejwe gushyiraho ikigo gishinzwe gushakira abakozi Leta, ariko icyo cyifuzo cyamaganirwa kure ngo kuko byari kujya bitinda cyane (bureaucracy).

Mu gihe abenshi mu rubyiruko bumva ko bagomba kubona akazi mu nzego za Leta, ngo buri mwaka abo Leta ishobora gukoresha ni 2% by’abafite imbaraga n’ubushobozi, kandi ngo uko ibintu bimeze nta kigaragaza ko bizahinduka vuba.

Kuba rero abashaka akazi basohoka mu mashuri makuru ari benshi cyane, bihoza Leta ku gitutu cy’uko abapiganira umwanya w’akazi baba ari benshi cyane bigatuma hari n’abatemera ibyatangajwe nyuma y’ibizamini by’akazi, ari naho hatuma umubare w’abadafitiye icyizere imitangirwe y’akazi uba munini.

Uko kuba abantu bakeneye akazi ari benshi, kandi ari urubyiruko, Leta yiyemeje kujya ihanga imirimo nibura 200 000 buri mwaka itarimo iy’ubuhinzi.

Iyi gahunda ngo yatangiye mu 2011 nk’uko Ministre yabisobanuye, ngo ntabwo iragera ku ntego zayo kuko nko mu 2012 ubushakashatsi bwerekanye ko hahanzwe imirimo nk’iyo 104 000 mu gihe urubyiruko rwarangije kwiga icyo gihe ari 125 000.

Umuti urambye rero ngo ni uko Leta yashyize imbaraga mu kwita ku mashuri y’imyuga n’ubumenyingiro, nka kimwe mu byatuma abayarangiza babasha guhanga akazi igihe bakabuze, ikindi ngo Leta ikorana n’Urugaga rw’abikorera mu kumenya ubumenyi bukenewe ku isoko kugira ngo ingengamyigire yo mu mashuri ivugururwe bitewen’igikenewe.

Minisitiri Murekezi akaba yavuze ko  nibura mu 2017 bateganya ko Leta izaba yageze mu ntego yo guhanga imirimo mishya 200 000 buri mwaka, ndetse ngo muri uwo mwaka barifuza ko umubare w’abanenga uko itangwa ry’akazi rimeze mu Rwanda waba wavuye kuri 33% ukagera nibura kuri 20%, bivuze ko abazaba bafite icyizere ku buryo akazi gatangwamo bazaba bageze kuri 80%.

Ikoranabuhanga mu gucunga abakozi

Minisitiri w’Umurimo yavuze ko hari kwibandwa cyane mu gukoresha Ikoranabuhanga mu guhuza imyirondoro ya buri mu kozi wa Leta, guhugura abakoresha mu bijyanye no gucunga abakozi kandi ngo buri mukozi wa Leta azahabwa agatabo gakubiyemo indangagaciro agomba kugenderaho.

Biciye mu ikoranabuhanga abakozi ngo bakazajya baha raporo abakoresha babo utayitanze ‘system’ izaba yashyizweho ikajya imwifungiraho bikagaragara agafatirwa ingamba nk’uko bisobanurwa na Ministre w’abakozi ba Leta.

Ministre Murekezi avuga ko ubu ngo mu nzego z’ibanze hagaragaraga ibirego byinshi bijya muri MIFOTRA by’imyitwarire y’abakozi bikaba bitwaraga umwanya mu nini mu kubikemura, iyo system y’ikoranabuhanga ikaba igiye kubikemura.

Ku kibazo cy’iyongezwa ry’umushahara w’Abaganga, Minisitiri yavuze ko utunama (councils) twabo aritwo tugomba kuzicara tugakora imbanziriza mushinga y’imishahara y’abaganga, guverinoma ikayigaho ifite aho ihera.

Ikindi ni ngo ni uko mu mategeko mashya, umukozi utabaza ibibazo bye by’ibirarane cyangwa andi mafaranga Leta imugomba, ngo nihashira imyaka ibiri, azajya aba atagifite uburenganzira bwo kujuririra ayo mafaranga.

Abasenateri bashimye ibisobanuro bya Minisitiri, ariko basaba ko mu gushyiraho uburyo bwo kugenzura abakozi hifashishijwe Ikoranabuhanga byasuzumwa neza ngo kuko bipfuye kandi byari byatangiye byakwica byinshi.

Komisiyo y’imibereho myiza y’abaturage, uburenganzira bwa muntu n’ibibazo by’abaturage muri Sena, ikuriwe na Hon Senateri Bishagara Kagoyire Therese, ikaba irimo Hon Senateri Musabeyezu Narcisse, Hon Senateri Niyongana Gallican, na Hon Senateri Emmanuel Bajyana.

Photos/ Ange Eric Hatangimana/UM– USEKE

HATANGIMANA Ange Eric
ububiko.umusekehost.com