Leta mu biganiro n’inganda hagamijwe gukemura ikibazo cy’ibikorerwa mu Rwanda bihenze

Kuri uyu wa 03 Gicurusi, Minisiteri y’Ubucuruzi n’Inganda yatangiye ibiganiro bizakomeza n’inganda zo mu Rwanda hagamijwe gushakira umuti ikibazo cy’ireme n’ibiciro by’ibikorerwa mu Rwanda bikomeje kuba imbogamizi ku isoko.

Mu biganiro byo kuri uyu wa kabiri, Minisiteri y’Ubucuruzi n’Inganda (MINICOM) yeretse inganda abafatanyabikorwa babiri barimo ikigo kizafasha inganda kumenyesha Abaturarwanda ibyo zikora, ndetse n’ikigo “ACUALINE Export” kizazifasha mu igenamigambi no kunoza imikorere yazo.

Abayobozi b’inganda zinyuranye zikorera mu Rwanda bashimye ubushake Guverinoma irimo kugeragaza kugira ngo babashe gukora neza; Bagaragaza kandi ibibazo binyuranye birimo iby’imisoro bikomeje gutuma ibyo bakora biba bihenze ugereranyije n’ibiva hanze.

Inganda zitunganya umusaruro w’ubuhinzi zagaragaje ikibazo cy’imisoro ku nyongeragaciro gituma ibyo bakora bihenda kurusha ibituruka hanze.

Minisitiri w’Ubucuruzi n’Inganda Francois Kanimba, asanga kuba ibikorerwa mu Rwanda bidashobora kunanirwaguhiganwa n’ibituruka hanze kubera umusoro.

Avuga ko bazakomeza ibiganiro n’inganda bigamije gushakira umuti igituma ibintu zikora bihenze kurusha ibituruka hanze, ndetse n’ibiba ngombwa n’amategeko abangamira imikorere yazo ahindurwe.

Yagize ati “Itegeko ry’umusoro ku nyongeragaciro rivuga ko ibihingwa bitishyura umusoro, ariko wabyongerera agaciro n’iyo kaba gatoya ugasanga umusoro w’inyongeragaciro ugiye ku gaciro kose k’icyo gicuruzwa harimo n’agaciro ka bya bindi by’ibanze bitishyura imisoro.

Icyo kibazo bakigejeje kuri Guverinoma, ni ikibazo kizaganirwaho kugira ngo turebe ukuntu aho bishoboka twazafata ibyemezo bikurikije amategeko ariho ariko binaborohereza,…Koko habaye ababura isoko biturutse kuri Politike y’imisoro numva ari ikibazo twemera ko kizakomeza kuganirwaho.”

Minisitiri Kanimba avuga ko bizavamo imyanzuro n’amategeko bizafasha inganda kubona isoko rirushijeho iryo zari zisanzwe zibona.

Guverinoma kandi ngo irimo gukora ibishoboka byose ngo ibibazo inganda zihura nabyo nk’umuriro w’amashanyarazi n’ibiciro byawo bikemuke.

Min. Kanimba ati “Mu biganiro tuzakomeza kugirana n’izi nganda hari n’ibindi bashobora kuzagenda batugiraho inama mu rwego rwa Politike bagira kugira ngo turebe niba hari ibyemezo twafata kugira ngo tubashe kujya ku isoko bashobora guhiganwa.”

Guverinoma yatangiye ubukangurambaga bwo gukangurira Abanyarwanda gukoresha iby’iwabo, nyuma yo gukora inyigo mu mwaka wa 2014 yagaragaje ko Leta ishyize imbaraga mu gukangurira abanyarwanda gukoresha iby’iwabo cyane cyane mu bwubatsi, mu myambaro n’inkweto ndetse n’ibikoresho by’ubwubatsi, yashobora kuzigama Miliyoni 450 z’Amadolari ya Amerika, yanganaga na 18% y’ibyo u Rwanda rwari rwatumije mu mahanga muri uwo mwaka.

Vénuste KAMANZI
UM– USEKE.RW