Kwibuka22: Rayon Sports FC yasuye urwibutso rwa Jenoside rwa Kigali

Kuri uyu wa gatatu, ikipe ya Rayon Sports FC yasuye urwibutso rwa Jenoside yakorewe Abatutsi rwa Kigali, rwo ku gisozi, mu Karere ka Gasabo.

Abayobozi, abatoza ndetse n’abakinnyi, bashyize indabo ku mva zishyinguyemo ibihumbi by’inzirakarengane zazize Jenoside yakorewe Abatutsi muri 1994.

Abakinnyi ba Rayon Sports batambagijwe ibice bitatu bigize urwibutso rwa Jenoside rwa Gisozi. Abakinnyi barimo abavutse nyuma ya Jenoside n’abanyamahanga, baboneyeho gusobanurirwa uko Jenoside yateguwe, n’uko yashyizwe mu bikorwa.

Rutahizamu wa Rayon Sports, Umugande Devis Kasirye nyuma yo gusura urwibutso yavuze ko asa nk’umenye ko Jenoside yabaye koko.

Yagize ati “Ni ubwa mbere igihe cyo Kwibuka abazize Jenoside kigeze ndi mu Rwanda. Ni n’ubwa mbere nsuye urwibutso rwayo. Ndumva byandenze. Ndi iwacu Uganda narebaga ‘film’ zerekana uko byagenze nkababara cyane, ariko nyuma yo gusura urwibutso, meze nk’ubibonye imbona nkubone. Byari birenze ubumuntu. Ntibizongere, mu Rwanda no ku Isi.”

Gacinya Dennis, Umuyobozi wa Rayon Sports FC yavuze ko bateguye iki gikorwa kugira ngo amateka y’u Rwanda akomeze asigasirwe, kandi yigishwe urubyiruko, harimo n’abakinnyi ba Rayon Sports.

Rayon Sports yatakaje ibihumbi by’abafana muri Jenoside yakorewe Abatutsi, ndetse itakaza abakinnyi bari bakomeye nka Murekezi Raphael Alias Fatikaramu, Munyurangabo Rongin, Bosco (Mwene Ruterana), Kirangi, Misili, Abba, Rutabingwa, Kalisa, Kayombya Charles, Mazina, George na Nyirirugo Antoine.

Hari kandi na bamwe mu bari bagize Komite ya Rayon Sports bahitanywe na Jenoside yakorewe Abatutsi mu 1994, nka Mujejende Benoit, Agronome Janvier, Kayombya Selesi, Munyamasheke na Viateur.

Imikino yo Kwibuka Jenoside yakorewe Abatutsi mu mupira w’amaguru iteganyijwe muri Kamena 2016.

UM– USEKE.RW