Kwibuka: Abarokokeye i Masoro bafite impungenge ko amateka y'iwabo azazima

Mu muhango wo kwibuka abazize Jenoside yakorewe Abatutsi bo mu Kagari ka Masoro, mu Murenge wa Ndera, mu Karere ka Gasabo, abaharokokeye baratangaza ko bafite impungenge ko iterambere ry’inganda ririmo kugera aho barokokeye rishobora kuzazimanganya amteka banyuzemo nihatagira igikorwa mu maguru mashya.

Ni ku ncuro ya kabiri abarokokeye i Masoro b’ibutse ku rwego rw’Akagari ka Masoro, ngo bahisemo kujya bibukira iwabo ku rwego rw’Aakagari nyuma yo kubona ko ibikorwa byo kwibuka bikorwa ku rwego rw’Umurenge wa Ndera n’impinduka z’iterambere rizanwa n’inganda n’abashoramari barimo kuhimukira bishobora kuzasibanganya amateka akomeye banyuzemo mu gihe cya Jenoside yakorewe Abatutsi bo muri aka gace.

Mukobwujaha imacullée, uhagarariye abarokotse bo mu Kagari ka Masoro ati “Harimo haraza inganda n’abashoramari bigatuma ha hantu twari dutuye yamiryango yazimye yazize Jenoside hagenda hahinduka kubera ibikorwa remezo, tudakomeje go tujye tubikorere hano dushobora gushiduka harazimye.”

Mukobwujaha avuga ko icyifuzo cyabo nk’abarokotse ari uko hashyirwa urwibuto cyangwa nibura urukuta rwanditseho amazina y’ababo kugira ngo igihe muri aka gace kagenewe inganda hazaba hamaze guhinduka inganda gusa nta muntu ukihatuye, ibyaho bitazibagirana kandi ruzajye rubafasha kwibuka ababo.

Ku birebana n’imibereho y’abarokotse b’i Masoro nyuma y’imyaka 20 Jenoside ihagaritswe, Mukobwujaha avuga ko batabayeho nabi cyane ariko nanone ntibabayeho neza aho bari hirya no hino.

Ati “Hari imiryango yazimye, iyasigaranye abapfakazi, n’iyasigaranye imfubyi, tugira inama imwe mu gihe cy’amezi abiri tugahura tukaganira ku buzima bwacu.”

Umubyeyi Nyirantagorama Jeanne warokokeye i Masoro yadutangarije ko umunsi wo kwibuka nk’abarokokeye i Masoro umwibutsa ibyo yaboneye muri aka kagari cyane cyane imiryango ye yahatitiriye.

Ati”Hano habaye amarorerwa, hari imiryango yagiye izimira, haguye abantu benshi cyane.”

Kimwe na mugenzi we, Nyirantagorama avuga ko n’ubwo bashegeshwe, nyuma y’imyaka 20 ubu bagerageza kwiyubaka, bakagerageza gusa neza, bakagerageza kusa ikivi abacu basize batangiye, guha abana baasigaranye umuco n’uburere no gukundana.

Abarokotse bo mu Kagari ka Masoro babashije gukora igikorwa cy’ubutwari cyo kubarura abantu babo bazize Jenoside yakorewe Abatutsi kabone n’ubwo ngo batararangize, bamaze kumenya abantu 680 bishwe.

Vénuste KAMANZI
ububiko.umusekehost.com